म. टा. प्रतिनिधी, औरंगाबाद
मारहाण करून विष पाजल्याच्या पती व पत्नीने एकमेकांविरुद्ध केलेल्या वेगवेगळ्या तक्रारीवरून सिटीचौक पोलिस ठाण्यात गुन्हा दाखल झाला असून, प्रकरणात आरोपी पती व दोन मुलांना मंगळवारी (१ ऑक्टोबर) अटक करण्यात आली. त्यांना न्यायालयात हजर करण्यात आले असता, तिघांना शनिवारपर्यंत (५ ऑक्टोबर) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एन. माने यांनी दिले.
या प्रकरणी तसलीम बेगम तैय्यब कुरेशी (४०, रा. लोटाकारंजा) हिच्या तक्रारीनुसार, २७ सप्टेंबर २०१९ रोजी दुपारी पावणे दोनला तसलीम घरी असताना तिचा पती तैय्यब कुरेशी जैनुल आबेदीन कुरेशी हा तिथे आला आणि त्याने तसलीमला बळजबरी विषारी औषध पाजले आणि अर्धे औषध स्वत: पिले. तसेच पतीने दुसरा विवाह केला असून, उदरनिर्वाहासाठी तो पैसे देत नाही, असेही तिने तक्रारीत म्हटले आहे. प्रकरणात तैय्यब कुरेशी याच्याविरुद्ध गुन्हा दाखल झाला असून, त्याला मंगळवारी अटक करण्यात आली. तर, तैय्यब कुरेशी जैनुल आबेदीन कुरेशी याच्या तक्रारीनुसार, १९९६ मध्ये त्याचे लग्न तसलीम हिच्याशी झाले होते. तेव्हापासून तसलीमचे सगळे लक्ष तैय्यबच्या मालमत्तेवर असून, घर तिच्या नावावर करुन देण्यासाठी ती तैय्यबशी सतत भांडत होती. २७ सप्टेंबर रोजी तैय्यब स्वत:च्या दुकानात असताना, तसलीम हिच्यासह सलमान कुरेशी, अनस कुरेशी, समीर कुरेशी ही मुले दुकानात आली व त्यांनी घर तसलीमच्या नावावर करून देण्यासाठी मारहाण केली व बळजबरी विष पाजले, अशी तक्रार तैय्यबने केल्यावरुन गुन्हा दाखल झाला असून, सलमान कुरेशी व अनस कुरेशी यांना अटक करण्यात आली. प्रकरणात तैय्यब कुरेशी, सलमान कुरेशी व अनस कुरेशी यांना मंगळवारी न्यायालयात हजर केले असता, आरोपींनी विष कुठून आणले, कुणी दिले व आरोपींनी ते कुठे लपवून ठेवले आहे आदी बाबींचा तसेच प्रकरणाचा सखोल तपास करावयाचा असून, तसलीम व समीर कुरेशी यांना अटक करावयाची आहे. त्यामुळे आरोपींना पोलिस कोठडी देण्याची विनंती सहाय्यक सरकारी वकील एस. आर. ढोकरट यांनी न्यायालयात केली. ही विनंती मान्य करून न्यायालयाने तिघांना शनिवारपर्यंत पोलिस कोठडी सुनावली.