मुख्यमंत्र्यांना काळे झेंडे दाखवणाऱ्यांवर लाठीचार्ज

मटा ऑनलाइन वृत्त। उस्मानाबाद

शेतकऱ्यांच्या कर्जमाफीच्या प्रश्नावर मराठवाडा दौऱ्यावर आलेल्या मुख्यमंत्री देवेंद्र फडणवीस यांना पारडी फाट्याजवळ काळे झेंडे दाखवणाऱ्या काँग्रेस कार्यकर्त्यांवर पोलिसांनी लाठीचार्ज केला. यावेळी कार्यकर्त्यांनी जोरदार घोषणाबाजी केली. त्यामुळे शेतकऱ्यांच्या प्रश्नांवर आगामी काळात विरोधक आणि सत्ताधाऱ्यांमध्ये तीव्र संघर्ष होण्याची चिन्हं आहेत.

शेतकरी कर्जमाफीच्या मुद्द्यावरून विरोधकांनी राज्यात रान उठवले आहे. त्यातच तूर डाळ खरेदी आणि इतर मुद्यांवरही शेतकऱ्यांमध्ये असंतोष खदखदत आहे. उस्मानाबादमधील शेततळी कामांची पाहणी करण्यासाठी मुख्यमंत्री शिवसेना खासदार रवींद्र गायकवाड यांच्यासह भूम तालुक्यात आले होते. वाशी तालुक्यातील पारडी फाट्य़ाजवळ आल्यानंतर युवक काँग्रेसच्या कार्यकर्त्यांनी मुख्यमंत्र्यांना काळे झेंडे दाखवत जोरदार घोषणाबाजी केली. परिस्थितीवर नियंत्रण मिळवण्यासाठी पोलिसांना कार्यकर्त्यांवर लाठीमार केला.

राज्यात शेतकरी कर्जमाफीच्या मुद्द्यावरून विरोधकांनी रान उठवले आहे. मराठवाड्याच्या दौऱ्यावर असलेल्या मुख्यमंत्री देवेंद्र फडणवीस यांच्याविरोधात आज, शनिवारी युवक काँग्रेसच्या कार्यकर्त्यांनी घोषणाबाजी केली. तसेच त्यांना काळे झेंडे दाखवले. परिस्थिती नियंत्रणात आणण्यासाठी पोलिसांनी युवक काँग्रेसच्या कार्यकर्त्यांवर लाठीमार केला. काही आंदोलकांनादेखील ताब्यात घेण्यात आले.

या दौऱ्यात मुख्यमंत्र्यांसोबत सहकार मंत्री सुभाष देशमुख, कामगार मंत्री संभाजी पाटील निलंगेकर, पशुसंवर्धन मंत्री महादेव जानकर आदी उपस्थित होते. मुख्यमंत्री देवेंद्र फडणवीस यांचे जालना जिल्ह्यातही नियोजित कार्यक्रम आहेत. उस्मानाबाद येथे झालेल्या आंदोलनाच्या पार्श्वभूमीवर पोलिसांनी या दौऱ्यात चोख बंदोबस्त ठेवला आहे.