धूत मोटर्सने १६ हजार द्यावेत

औरंगाबाद : ह्युंदाई मोटर्स इंडिया लिमिटेडचे अधिकृत विक्रेते, अदालत रोडवरील धूत मोटर्सने ग्राहकाकडून २१ हजार रुपये रोख घेऊनही वेळेत गाडी उपलब्ध करून दिली नाही. ग्राहकाकडून रक्कम घेऊनही वेळेत सेवा उपलब्ध करण्यात आपयशी ठरल्याबद्दल धूत मोटर्सने १६ हजार रुपये ग्राहकास व्याजासह परत करावेत, असे आदेश जिल्हा ग्राहक तक्रार निवारण मंचाचा अध्यक्षा नीलिमा संत, सदस्य संध्या बारलिंगे व किरण ठोले यांनी दिले आहेत. तक्रारदारास मानसिक व शारीरिक त्रास झाल्याबद्दल पाच हजार रुपये भरपाई व खर्च तीन हजार रूपये देण्याचे आदेश दिले आहेत.
तक्रारकर्ते संजय अभिमन्यू वाकुरे (कोनिका हाउसिंग सोसायटी, एन-४ ,सिडको) १७ जानेवारी २०१४ रोजी ग्रँड आय-टेन घेण्यासाठी संजय जाजू, विवेक देशमुख व राजू भिसे यांना घेऊन अदालत रोड येथील धूत मोटार्समध्ये गेले. त्यांना हवी असलेली गाडी उपलब्ध नसल्याने १५ दिवस वाट पाहावी लागेल, असे त्यांना सांगण्यात आले. त्यासाठी आगाऊ रक्कम २१ हजार रुपये भरावी लागेल, असेही त्यांना सुचविण्यात आले. १५ दिवसात वाहन मिळाले नाही, तर रक्कम परत केली जाईल असेही त्यांना सांगण्यात आले. रक्कम भरल्यानंतर वारंवार विचारणा करूनही गाडी मिळत नसल्याने त्यांनी रक्कम परत मागितली. लवकरच रक्कम देऊ म्हणून माेघम सांगण्यात आले. अखेर तीन महिन्यांनी वाहन देतो म्हणून त्यांना सांगण्यात आले, परंतु आपणास गाडी परत हवी आहे, असे तक्रारदारांनी शेवटचे सांगून टाकले. रक्कम मिळत नसल्याने त्यांनी नोटीस पाठविली. अखेर तक्रारदार वाकुरे यांनी मंचात धाव घेतली.