डोक्यात गोळ्या झाडून कंत्राटदाराचा खून
म टा प्रतिनिधी, जालना मोटारसायकलवरून आलेल्या दोन जणांनी गोळ्या झाडून जालना औद्योगिक वसाहतीमधील मजूर कंत्राटदार संजय अंभोरे (वय ४३, रा...
म. टा. प्रतिनिधी, जालना
मोटारसायकलवरून आलेल्या दोन जणांनी गोळ्या झाडून जालना औद्योगिक वसाहतीमधील मजूर कंत्राटदार संजय अंभोरे (वय ४३, रा. शेलगाव) यांचा खून केला. ही घटना सोमवारी सायंकाळी साडेसात वाजता शेलगाव जवळील राजपूतवाडी जवळ भर रस्त्यावर घडली.
संजय अंभोरे हे सोमवारी रात्री साडेसातच्या सुमारास राजपूतवाडी गावाजवळून त्यांच्या कारमधून (एम एच२१, ए जे ४१४१) जात होते. त्यावेळी त्यांना मोटारसायकलवरून आलेल्या दोन जणांनी अडविले. त्यानंतर त्यांच्यावर गावठी पिस्तुलातून पाठीमागून डोक्यावर आणि एक छातीवर असे अगदी जवळून गोळ्या झाडल्या. या हल्यात गंभीर जखमी झालेल्या अंभोरे यांना तातडीने जालना येथील दीपक हॉस्पिटलमध्ये दाखले करण्यात आले, तिथे त्यांचा मृत्यू झाला.
अंभोरे यांचा जालना औद्योगिक वसाहतीतील कारखान्यांना मजूर पुरवठा कंत्राटदारीचा व्यवसाय होता. त्यांच्यावर वर्षभरापूर्वी चंदनझिरा परिसरात दोन ते तीन गुंडांनी भ्याड हल्ला केला होता. यामध्ये त्यांचे दोन पाय फ्रॅक्चर झाले होते. याप्रकरणी त्यावेळी एका सराईत गुन्हेगारासह एका जणांविरुद्ध खुनाच्या प्रयत्नाचा गुन्हा दाखल केला होता. त्यावेळी आरोपींना अटक करण्यात आली होती. दरम्यान, काही दिवसापूर्वी संजय अंभोरे यांनी पोलिस अधीक्षकांना निवेदन देऊन आपल्या जीवितास धोका असून, आरोपीकडे गावठी पिस्तूल असल्याची तक्रार केली होती.