चिंता वाढली! औरंगाबादेत २ करोनाबाधित महिलांचा मृत्यू

म. टा. प्रतिनिधी, औरंगाबाद: शहरातील दोन करोनाबाधित महिलांचा उपचारादरम्यान घाटी रुग्णालयामध्ये मृत्यू झाला. त्यामुळे जिल्ह्यातील करोनाबाधितांच्या मृत्यूची संख्या ४४ झाली आहे. तसेच आतापर्यंत जिल्ह्यातील करोनाबाधितांची संख्या १,२१२ झाली आहे. तर ५०० हून अधिक बाधित हे करोनामुक्त होऊन घरी परतले आहेत.

शहरातील संजय नगर भागातील ४१ वर्षीय महिला रुग्णास १६ मे रोजी शासकीय वैद्यकीय महाविद्यालय व रुग्णालयामध्ये (घाटी) दाखल करण्यात आले होते. संबंधित महिला ही करोनाबाधित असल्याचे १९ मे रोजीच्या चाचणी अहवालातून स्पष्ट झाले. मात्र न्यूमोनिया, गंभीर श्वसनविकार, उच्च रक्तदाब, मधुमेह आदी अतिजोखमीचे आजार आणि करोना विषाणूच्या संसर्गामुळे संबंधित महिला रुग्णाचा गुरुवारी (२१ मे) दुपारी एक वाजता मृत्यू झाला. तसेच बहादूरपुरा येथील ७० वर्षीय महिलेला १४ मे रोजी घाटी रुग्णालयामध्ये दाखल करण्यात आले होते. ही महिला करोनाबाधित असल्याचे १५ मे रोजी प्राप्त झालेल्या अहवालावरून स्पष्ट झाले होते. उपचारादरम्यान दोन्ही फुफ्फुसांचा न्युमोनिया, श्वसनविकार, मधुमेह आदी आजार आणि करोना संसर्गामुळे या वृद्ध महिलेचा आज, शुक्रवारी (२२ मे) पहाटे ३.१५ वाजता मृत्यू झाला, असे घाटी प्रशासनाच्या वतीने कळविण्यात आले. त्यामुळे जिल्ह्यातील करोनाबाधितांच्या मृत्यूची संख्या आता ४४ झाली आहे.

औरंगाबादेत धोका वाढला; करोनाचे नवे २६ रुग्ण, बाधितांची संख्या १२०० वर

दरम्यान, शहर परिसरात आज आणखी २६ व्यक्ती करोनाबाधित असल्याचे निदान झाले आहे. त्यामुळे जिल्ह्यातील एकूण करोनाबाधितांची संख्या १२१२ झाली आहे. बाधितांमध्ये जयभीम नगर येथील ५, गरम पाणी २, रहेमानिया कॉलनी २, कुवार फुल्ली, राजाबाजार १, सुराणा नगर १, मिलकॉर्नर १, न्याय नगर ४, भवानीनगर, जुना मोंढा ३, पुंडलिकनगर १, सातारा परिसर १, जवाहर कॉलनी १, कटकट गेट ३, एक-दोन, सिडको, ठाकरे नगर येथील १ या भागातील व्यक्तींचा समावेश आहे. यात ८ वर्षांची दोन मुले आणि ७० वर्षांच्या व्यक्तीचाही समावेश आहे. बाधितांमध्ये १० महिला, तर १६ पुरुष आहेत.

फोटो: मरणयातना! करोनाबाधिताच्या आणि कुटुंबीयांच्या...