औरंगाबादेत आणखी २ करोनाबळी; आतापर्यंत ३४ मृत्यू

म. टा. प्रतिनिधी, औरंगाबाद: शहरातील आणखी दोन करोनाबाधितांचा आज, सोमवारी मृत्यू झाला. घाटी रुग्णालयात त्यांच्यावर उपचार करण्यात येत होते. जिल्ह्यातील करोनाबाधित रुग्णांच्या मृत्यूची संख्या आता ३४ झाली आहे. तर जिल्ह्यातील बाधितांची एकूण संख्या १०२२ झाली आहे.

शहरातील पैठण गेट परिसरातील ५६ वर्षीय महिला रुग्णाला रविवारी (१७ मे) शासकीय वैद्यकीय महाविद्यालय व रुग्णालयामध्ये (घाटी) दाखल करण्यात आले होते, तर संबंधित महिला ही करोनाबाधित असल्याचे त्याच दिवशी प्राप्त झालेल्या चाचणी अहवालातून स्पष्ट झाले होते. मात्र न्युमोनिया, गंभीर श्वसनविकार, मधुमेह व करोना विषाणूच्या संसर्गामुळे निर्माण झालेल्या गुंतागुंतीमुळे संबंधित महिलेचा उपचारादरम्यान सोमवारी दुपारी साडेबाराच्या सुमारास मृत्यू झाला. तसेच बुढीलेन परिसरातील ४२ वर्षीय पुरुष रुग्णाला १४ मे रोजी घाटी रुग्णालयामध्ये दाखल केले होते. त्याच दिवशी प्राप्त झालेल्या चाचणी अहवालावरून संबंधित रुग्ण हा करोनाबाधित असल्याचे स्पष्ट झाले होते. मात्र, न्युमोनिया, श्वसनविकार तसेच उच्च रक्तदाब व अतिस्थुलपणामुळे निर्माण झालेल्या गंभीर समस्यांमुळे रुग्णाचा सोमवारी दुपारी दोनला मृत्यू झाला. जिल्ह्यात आतापर्यंत ३४ करोनाबाधितांचा मृत्यू झाला आहे, तर करोनाबाधितांचा आकडा १०२२वर पोहोचला आहे.

बीडमध्ये करोनाचा पहिला बळी

बीड जिल्ह्यात करोनानं पहिला बळी घेतला आहे. जिल्हा रुग्णालयात उपचार घेत असलेल्या करोना पॉझिटिव्ह महिलेचा आज पहाटे मृत्यू झाला. करोनानं मृत्यू झालेली महिला नगर जिल्ह्यातील पिंपळगाव कौडा येथील रहिवासी होती. आष्टी तालुक्यातील सांगवी पाटण येथे पाहुण्यांकडे ती राहायला आली होती. तिच्यासोबत आणखी सहा जण होते. करोनाचा संसर्ग झाल्याचा संशय आल्याने त्यांच्यावर उपचार सुरू होते. त्यापैकी या महिलेचा रविवारी चाचणी अहवाल पॉझिटिव्ह आला होता. त्यामुळं तिच्यावर उपचार सुरू होते.

औरंगाबादेत ५९ बाधितांची भर; रुग्णसंख्या हजाराच्या पार

करोना विषाणू संसर्गाचे घाटीत ३९ रुग्ण गंभीर