म. टा. प्रतिनिधी, औरंगाबाद
उज्ज्वला गॅस योजनेअंतर्गत गॅस जोडणी वाटप करताना झालेल्या वादानंतर घरी जाऊन धमकावल्याने शारदा अभिमन्यू भालेराव (वय ५५ रा. अशोकनगर, नारेगाव) यांचा 'ब्रेन हॅमरेज'ने गुरुवारी सायंकाळी मृत्यू झाल्याचा आरोप नातेवाईकांनी केला. धमकी देणारे नगरसेवक राजू शिंदे व त्यांच्या साथीदारांवर गुन्हा दाखल करावा, अशी मागणी करीत नातेवाईकांनी शुक्रवारी आधी मृतदेह ताब्यात घेण्यास नकार दिला होता, मात्र पोलिसांच्या हस्तक्षेपानंतर मृतदेह ताब्यात घेऊन अंत्यविधी करण्यात आला.
मृत शारदा भालेराव यांची मुलगी नीता भालेराव यांनी दिलेल्या माहितीनुसार, १९ मे रोजी नगरसेवक राजू शिंदे व सहकाऱ्यांनी नारेगाव येथे उज्ज्वला योजनेतून गॅस जोडणी वाटपाचा कार्यक्रम आयोजित केला होता. मात्र त्यासाठी नागरिकांकडून प्रत्येकी १३०० रुपये घेण्यात येत होते. त्यामुळे नागरिकांनी सामाजिक कार्यकर्त्या दीपा मिसाळ व नीता भालेराव यांना हा प्रकार सांगितला. मिसाळ व भालेराव यांनी कार्यक्रमस्थळी जाऊन विचारणा केल्यानंतर तेथे वाद झाला. यानंतर गुरुवारी सायंकाळी राजू शिंदे हे सहकाऱ्यांसह भालेराव यांच्या घरी आले, मात्र नीता भालेराव या घरी नसल्याने त्यांनी आई शारदा भालेराव यांना धमक्या दिल्या व मुलीला मारून टाकू असे सांगितले. नीता भालेराव यांना घरी आल्यानंतर आई घाबरलेली व अस्वस्थ असल्याचे दिसले, त्यानंतर काही वेळातच त्यांचा मृत्यू झाला. राजू शिंदे यांनी धमकी दिल्यामुळेच आई तणावात होती, त्यामुळे त्यांचा 'ब्रेन हॅमरेज'ने मृत्यू झाल्याचा आरोप करत नगरसेवक शिंदे व इतरांवर गुन्हा दाखल करण्याची मागणी नीता भालेराव यांनी केली. भालेराव कुटुंबाने शुक्रवारी पोस्टमार्टेमनंतर मृतदेह ताब्यात घेण्यास नकार दिला होता. याप्रकरणी सिडको एमआयडीसी पोलिस ठाण्यात नोंद करण्यात आली आहे.
…
१९ मे रोजी गॅस वाटपाच्या कार्यक्रमात काही महिलांनी गोंधळ घातला होता. तसेच गुरुवारी नारेगावात जाऊन आपण कोणालाही धमकी दिलेली नाही. हा राजकीय षडयंत्राचा भाग आहे. गेल्या सात दिवसांपासून आपण गावात गेलेलो नाही. पोलिसांनी याबाबत पूर्ण चौकशी करावी.
- राजू शिंदे, नगरसेवक