लग्नसंमारभात बँड पथकासाठी प्रशासनाने काढले नवे नियम; जाणून घ्या...

औरंगाबादः लग्न समारंभातील होणारी गर्दी आणि वाढत्या करोना रुग्णांची संख्या पाहता जिल्हा प्रशासनाने एक महत्त्वाचा निर्णय घेतला आहे. यापुढे लग्न समारंभामध्ये येणाऱ्या बँड पथकामध्ये बँड वाजवणाऱ्या प्रत्येक व्यक्तीला दोन लस घेणे बंधनकारक करण्यात आले आहे. त्यामुळे आता यापुढे दोन लस घेतल्याशिवाय लग्नातील बँड वाजणार नाही.

औरंगाबाद जिल्हा प्रशासनाने दिलेल्या माहितीनुसार, लग्न सोहळे इतर सामाजिक सांस्कृतिक कार्यक्रम समारंभाच्या ठिकाणी कार्यरत बँड पथकातील मनुष्यबळाचे दोन्ही लसीचे डोस झालेले असणे अनिवार्य, तसेच लसीकरण पूर्ण झालेलेच प्रत्यक्ष उपस्थित राहू शकतील. त्यामुळे बँड पथकातील दोन्ही लसीकरण झालेल्या व्यक्तींनाच केवळ प्रवेश देण्यात यावा असा आदेश जिल्हा प्रशासनाने काढला आहे. तसेच याची संपूर्ण जबाबदारी संबंधित बँड व्यवस्थापक व मालकाची असेल.

वाचाः गडचिरोली जिल्ह्यात महाविकास आघाडीने राखले वर्चस्व; 'ही' आहे ताजी आकडेवारी
लग्न सोहळ्यातील बँड पथकामध्ये करोना प्रतिबंधासाठीच्या लसीचे दोन डोस घेतलेलेच वादक असावेत असे आदेश जिल्हा आपत्ती व्यवस्थापन प्राधिकरणाने काढले आहेत. बँड व्यावसायिक वादक व कलाकारांच्या रोजी रोटीचा विचार करुन हा निर्णय घेण्यात आल्याचे या आदेशात नमूद करण्यात आले आहे.

तसेच, बँड पथकातील वादक तसेच मालक, वादक कलाकारांनी कोविड-१९ प्रतिबंधक शिष्टाचाराचे तंतोतंत पालन करणे अनिवार्य असणार आहे. बँड पथक मालकाने पथकासाठी Thermal-Scanner, Hand Sanitizer कार्यक्रमात सहभागी होताना उपलब्ध ठेवावी. संबंधित ठिकाणी वेळोवेळी कोविड-19 चाचणी करण्यात यावी. त्यामुळे दोन लस घेतल्यानंतरच बँड वाजता येणार आहे, असे आदेश जिल्हाधिकारी सुनील चव्हाण यांनी आज काढलेला आहे.

वाचाः संसारातील जोडगोळी आता राजकारणातही एकत्र नांदणार; नवरा-बायको विजयी