गो हत्येबद्दल काहीही वादग्रस्त बोललो नाही: दानवे

जालना : गो हत्येविषयी वादग्रस्त वक्तव्य केल्याचा आरोप केंद्रीय राज्यमंत्री रावसाहेब दानवे यांनी स्पष्ट शब्दांत फेटाळला आहे. 'मी असं कोणतंही वक्तव्य केलेलं नाही. व्हिडिओमध्ये छेडछाड करून खोडसाळपणे समाजमाध्यमावर चुकीचं वृत्त पसरवलं जात आहे,' असा खुलासा दानवे यांनी या संदर्भात केला आहे.

दानवे यांचे चिरंजीव संतोष दानवे हे भोकरदन विधानसभा मतदारसंघातून निवडणुकीच्या रिंगणात आहेत. त्यांच्या प्रचारासाठी मुस्लिम वस्ती असलेल्या कठोडाबाजार येथे काही दिवसांपूर्वी दानवे यांची एक छोटेखानी सभा झाली. दानवे यांनी या सभेत आपल्या खास ग्रामीण शैलीत भाषण केलं. याच सभेचा व्हिडिओ व्हायरल झाला आहे. व्हिडिओमध्ये ते या भागातील अवैध धंदे, सरकारी धान्याच्या काळाबाजाराची पाठराखण करीत असल्याचं दिस आहे. मोदी सरकारच्या कामाचा पाढा वाचताना ते गो हत्येच्या निर्णयाबद्दलही बोलले आहेत. त्यासाठी बकरी ईदच्या वेळचा एक प्रसंग सांगतानाही ते दिसत आहेत. बकरी ईदच्या वेळी मुस्लिम समाजातील काही लोक आपल्याकडं कत्तलीवरील बंदीची तक्रार घेऊन आले होते. रावसाहेब दानवे असेपर्यंत काहीही बंद होणार नाही, असं मी तेव्हा त्यांना म्हणालो होतो, अशी आठवण ते मतदारांना देत आहेत. त्यांचा हाच व्हिडिओ व्हायरल झाला असून त्यावरून त्यांच्यावर टीकेची झोड उठली आहे.


दानवे यांनी सविस्तर निवेदन काढून याबाबत खुलासा केला आहे. या व्हिडिओमध्ये छेडछाड करून, काही जणांकडून खोडसाळपणे हा व्हिडिओ पसरवण्यात येत आहे. विनासंदर्भ दाखवला जात आहे,' असं त्यांनी निवेदनात म्हटलं आहे.