म. टा. प्रतिनिधी, औरंगाबाद
व्यवसायासाठी इंदूरच्या व्यापाऱ्याकडून ३० लाखांचे कर्ज घेऊन त्याला बनावट चेक देत गंडा घालणाऱ्या आरोपीला आर्थिक गुन्हेशाखेने अटक केली. अखिलेश कांतीलाल सोनी असे आरोपीचे नाव असून जून २०१५मध्ये त्याने हा प्रताप केला होता.
इंदूर येथील व्यापारी धन्नालाल हीरालालजी गोयल हे व्यवसायासाठी कर्ज पुरवठा करतात. अखिलेश सोनी (रा. शांतीविला, एन ३, सिडको) याने त्यांना व्यवसायासाठी ३० लाख रुपये कर्जाची मागणी केली होती. एक रुपये पस्तीस पैसे दर शेकडा दर महिनाप्रमाणे दहा लाखांच्या तीन डीडीद्वारे ही रक्कम जून २०१५ मध्ये गोयल यांनी सोनीच्या बँकखात्यावर जमा केली. या ३० लाखांच्या बदल्यात सोनीने ९ ऑक्टोबर २०१५ रोजी आयडीबीआय बँकेचे १० लाखांचे तीन चेक सह्या करून गोयल यांना दिले. गोयल यांनी इंदूर येथील त्रावणकोर बँकेत जानेवारी २०१६ मध्ये हे चेक वटवण्यासाठी टाकले. यावेळी बँकेने चेकमधील सह्यामध्ये फरक असल्याचे सांगत चेक परत केले. सोनीने कर्ज घेताना जाणीवपूर्वक बनावट सह्या असलेले चेक दिल्याचे गोयल यांच्या लक्षात आले. याप्रकरणी त्यांनी आर्थिक गुन्हे शाखेकडे तक्रार दिली. चौकशीमध्ये ही फसवणूक झाल्याचे निष्पन्न झाल्याने सोनीविरुद्ध मुकुंदवाडी पोलिस ठाण्यात अपहार व फसवणुकीचा गुन्हा दाखल करण्यात आला आहे. आर्थिक गुन्हेशाखेने अखिलेश सोनीला अटक केली असून त्याला कोर्टात हजर करण्यात आले असता दोन दिवसांची पोलिस कोठडी सुनावण्यात आली. पोलिस आयुक्त अमितेशकुमार, उपायुक्त संदीप आटोळे, एसीपी खुशालचंद बाहेती, पोलिस निरीक्षक मधुकर सावंत यांच्या मार्गदर्शनाखाली पीएसआय सुभाष खंडागळे याप्रकरणी तपास करीत आहेत.
जालन्याच्या व्यापाऱ्याची ५७ लाखांची फसवणूक
आरोपी अखिलेश सोनीने जालना येथील व्यापारी परेश निमिचंदजी रुणवाल यांना ५७ लाखांचा गंडा घातला आहे. सरकी बियाणे पाठवतो म्हणत, त्याने ही रक्कम घेतली होती. रक्कम परत केली नसल्याने रुणवाल यांच्या तक्रारीवरून उस्मानपुरा पोलिस ठाण्यात सोनीविरुद्ध फसवणुकीचा गुन्हा दाखल करण्यात आला आहे. आरोपी सोनीने इतर व्यापाऱ्यांनाही फसवल्याच्या तक्रारी आर्थिक गुन्हे शाखेकडे प्राप्त होत आहेत.