पत्नीच्या छळामुळे पोलिस पती बेपत्ता

औरंगाबाद ः पत्नी व सासरच्या छळाला कंटाळून पोलिस कर्मचारी मंगळवारपासून बेपत्ता आहे. या कर्मचाऱ्याने पोलिस आयुक्तांना आपण आत्महत्या करणार असल्याची चिठ्ठी पाठवली आहे. दरम्यान या पोलिसाच्या पत्नीने सिडको पोलिस ठाण्यात पती बेपत्ता झाल्याचा अर्ज दिला.

श्याम बाबूलाल पोळ हे पोलिस कॉन्स्टेबल सिडको सहाय्यक पोलिस आयुक्त कार्यालयात कार्यरत आहेत. २६ जुलैपासून पोळ बेपत्ता झाले. दरम्यान पोळ यांनी पोलिस आयुक्त आमितेशकुमार यांच्या नावे एक चिठ्ठी लिहून पाठवली आहे. यामध्ये पत्नीच्या छळाला कंटाळून मी आत्महत्या करीत असून माझा मृतदेह पत्नीच्या ताब्यात न देता माझ्या मुलांना माझा चेहरा दाखवा अशी विनंती करण्यात आली आहे. त्यांच्या पत्नीने पती हरवल्याची तक्रार सिडको पोलिसात दिल्यानंतर त्यांचा शोध घेण्याचा प्रयत्न करण्यात आला. मात्र, पोलिसांना यश आले नाही. चिठ्ठी मिळाल्यानंतर अमितेशकुमार यांनी हे प्रकरण गांर्भियाने घेत पोळ यांचा शोध घेण्याचे आदेश दिले आहेत. पोलिसांनी सिडको परिसरातील विहिरी, आडाची देखील तपासणी केली. मात्र, काही हाती लागले नाही. बेपत्ता पोळ यांचा शोध रात्री उशिरापर्यंत सुरू होता.