म. टा. प्रतिनिधी, औरंगाबाद
यूपीआय अॅपद्वारे 'बँक ऑफ महाराष्ट्र'ची एक कोटी सहा लाखांची फसवणूक केल्याप्रकरणात बारावा आरोपी दादासाहेब कडुबा महानोर याला गुरुवारी अटक करण्यात आली. त्याला न्यायालयात हजर केले असता, रविवारपर्यंत (११ ऑगस्ट) पोलिस कोठडीत ठेवण्याचे आदेश प्रथम वर्ग न्यायदंडाधिकारी आय. के. सूर्यवंशी यांनी दिले.
या प्रकरणी बँकेचे करमाड शाखेचे व्यवस्थापक तुषार संदीप भुयार यांनी फिर्याद दिली होती. फिर्यादीनुसार, युपीआय अॅपद्वारे ३० ऑक्टोबर २०१६ ते १८ जानेवारी २०१७ या कालावधीत १७ आरोपी ग्राहकांनी बँकेची एक कोटी सहा लाख रुपयांची फसवणूक केली. प्रकरणात करमाड पोलिस ठाण्यात गुन्हा दाखल करण्यात आला असून, आतापर्यंत ११ आरोपींना अटक करण्यात आली आहे. त्यांच्याकडून एक लाख ९८ हजार रुपयांची रक्कम जप्त करण्यात आली आहे. या प्रकरणात आरोपी महानोर याला अटक करून न्यायालयात हजर केले असता, आरोपीकडून १६ लाख ९८ हजार ९७५ रुपये जप्त करणे तसेच आरोपीने नेमकी कशा प्रकारे बँकेची फसवणूक केली याचा तपास करुन इतर आरोपींची माहिती घेणे बाकी असल्याने आरोपीला पोलिस कोठडी देण्याची विनंती सहाय्यक सरकारी वकील उद्धव वाघ यांनी न्यायालयात केली. ही विनंती मान्य करुन न्यायालयाने आरोपीला रविवारपर्यंत पोलिस कोठडी सुनावली.