म. टा. प्रतिनिधी, औरंगाबाद
प्रलंबित मागण्या पूर्ण करण्यासाठी विविध संघटनांनी डॉ. बाबासाहेब आंबेडकर मराठवाडा विद्यापीठाचे कुलगुरू डॉ. प्रमोद येवले यांना निवेदने दिली. विद्यापीठ कास्ट्राईब शिक्षक आणि शिक्षकेतर कर्मचारी संघटना, भीमशक्ती रोजंदारी कर्मचारी युनियन, विद्यापीठ शिक्षकेतर मागासवर्गीय कर्मचारी, अभाविप, रिपब्लिकन विद्यार्थी सेना यांचा त्यात समावेश होता.
विद्यापीठ कास्ट्राईब शिक्षक आणि शिक्षकेतर कर्मचारी संघटनेच्या शिष्टमंडळाने कार्याध्यक्ष डॉ. वाल्मिक सरवदे यांच्या नेतृत्वाखाली कुलगुरूंची भेट घेतली. संघटनेच्या कार्यालयासाठी विद्यापीठात जागा द्यावी, कर्मचाऱ्यांना घर बांधणीसाठी अत्यल्प व्याजदरात वित्तीय मदत करण्याची मागणी करण्यात आली. यावेळी अध्यक्ष तुषार गांगुर्डे, जितेंद्र पाटील, नीलेश कांबळे, रत्नाकर झाडे, राहुल इंगळे उपस्थित होते. भीमशक्ती रोजंदारी कर्मचारी युनियनने रोजंदारी कर्मचाऱ्यांना विद्यापीठ सेवेत सामावून घेण्याची मागणी केली. २०१० ते २०१२ या कार्यकाळातील थकीत पी.एफ. कामगारांना व्याजासह द्यावे, विद्यापीठ फंडातील बेकायदेशीर नियुक्त्या रद्द करा, रोजंदारी कर्मचाऱ्यांचे वेतन १५ तारखेच्या आत देण्याची मागणी संघटनेने केली. यावेळी किरणराज पंडित, भगवान निकाळजे, धनराज भिंगारे, किशोर भिंगारे, रतन चाबूकस्वार, शांतीलाल भिंगारे, उत्तम जाधव उपस्थित होते. अभाविप संघटनेच्या पदाधिकाऱ्यांनी कुलगुरूंची भेट घेत विद्यार्थ्यांच्या मागण्यांचे निवेदन दिले. यावेळी शिवा देखणे, गोविंद देशपांडे, विवेक पवार उपस्थित होते.
\Bपारदर्शी अधिकारी नेमा
\Bविद्यापीठ शिक्षकेतर मागासवर्गीय संघटनेने कुलगुरूंना निवेदन विद्यापीठाचा कारभार स्वच्छ व पारदर्शी करण्यासाठी पारदर्शी अधिकाऱ्याची नेमणूक करण्याची मागणी केली. तत्कालीन बीसीयूडीचे संचालक व पर्यावरणशास्त्र विभागप्रमुख डॉ. सतीश पाटील यांच्यावर आरोप आहेत. परीक्षेतील कामकाजातून त्यांना बहिष्कृत करण्यात आले आहे. तसेच पेटंटच्या तक्रारी असल्यामुळे त्यांना कोणतेही पद देऊ नये अशी मागणी संघटनेचे अध्यक्ष सुभाष बोरीकर यांनी केली.