ऊर्जामंत्री बावनकुळेंकडून सारवासारव
म. टा. प्रतिनिधी, जालना
भारतीय जनता पक्षाचे प्रदेशाध्यक्ष तथा खासदार रावसाहेब पाटील-दानवे यांनी २,५९,५३० रूपयांची वीजबिल थकवल्याचे उघड झाले आहे. ऊर्जामंत्री बावनकुळे यांच्या येथील जनता दरबारानंतर शनिवारी हा प्रकार उघड झाल्याने बावनकुळे एकदम गांगरून गेले. या प्रश्नाला पद्धतशीर बगल देत मंत्र्यांनी सारवासारव केली. दानवेंच्या भोकरदनच्या शिवाजीनगरमधील निवासस्थानाचे ८३ महिन्यांचे हे वीजबिल आहे.
उर्जामंत्र्यांच्या जनता दरबारात विविध प्रश्नांवर चर्चा झाली. जिल्ह्यातील सर्वच आमदार, पदाधिकाऱ्यांनी त्यांच्याकडे निधी देण्याची मागणी केली. जिल्ह्यात वीज देयकांची मोठ्या प्रमाणात थकबाकी असल्याचा मुद्दाही समोर आला. साधारणपणे थकीत १२०० कोटींच्या वसुलीसाठी लोकप्रतिनिधींनी वीज कंपनीला मदत करण्याचे आवाहन मंत्र्यांनी केले. मात्र, दानवेंकडील थकबाकीवसुलीबाबत कोणतेच उत्तर त्यांच्याकडे नव्हते.
दरम्यान, सर्वसामान्यांचे वीजबिल थकल्यास तात्काळ वीज पुरवठा तोडला जातो. मात्र, दानवेंकडे मोठी थकबाकी असूनही कारवाई न झाल्याबद्दल नागरिकांनी नाराजी व्यक्त केली.
दरम्यान, या प्रकरणी रविवारी कारवाई केली जाईल अशी माहिती महावितरणचे सहव्यवस्थापकीय संचालक ओमप्रकाश बकोरिया यांनी सांगितले आहे.