म. टा. प्रतिनिधी, औरंगाबाद
आरटीई अंतर्गत मोफत प्रवेशाचे शासनाकडे राहिलेल्या शुल्काची रक्कम परत मिळावी यासाठी 'मेस्टा'च्या पदाधिकाऱ्यांनी शिक्षणाधिकारी यांची भेट घेतली. जिल्ह्यातील साडेपाच कोटी रुपयांची थकबाकी असून थकबाकी देण्याबाबतचे आश्वासन शिक्षणाधिकाऱ्यांनी दिल्याचे संघटनेने स्पष्ट केले.
परतावा शुल्काबाबत संघटनेच्या शिष्टमंडळाने शिक्षणाधिकारी सुरजप्रसाद जैस्वाल यांची भेट घेतली. जिल्ह्यातील विविध शाळांचे शुल्क अनेक वर्षापासून शासनाकडे प्रलंबित आहेत. हा निधी तत्काळ देण्यात यावा, अशी मागणी करण्यात आली. वेळेत शुल्क परतावा मिळावा अन्यथा महाराष्ट्र इंग्रजी शाळा ट्रस्टीज असोशिएशन (मेस्टा) आंदोलन करेल, असा इशारा देण्यात आला आहे. यावेळी जिल्हा शहराध्यक्ष राजू नगरकर, संतोष सोनवणे, मनीष हंडे, संदीप लगाने, कविता सोनवणे, श्रीधर नायर, विलास साळुंके यांची उपस्थिती होती.