\Bम. टा. प्रतिनिधी, औरंगाबाद\B
उद्योजकाला एक लाख रुपयांच्या खंडणीसाठी पत्नीचे अश्लील फोटो सोशल मीडियावर टाकू अशी धमकी एका मोबाइलधारकाने दिली. या प्रकरणी उस्मानपुरा पोलिस ठाण्यात संशयित आरोपीविरुद्ध खंडणीचा गुन्हा दाखल करण्यात आला आहे.
एक उद्योजक ज्योतीनगर भागात वास्तव्यास आहेत. उद्योजक, त्यांची पत्नी आणि मित्र गुरुवारी दुपारी घरात गप्पा मारीत होते. यावेळी उद्योजकांच्या मोबाइलवर एका अनोळखी मोबाइल क्रमांकावरून कॉल आला. समोरील व्यक्तीने सादी अहेमद असे नाव सांगत 'तुमच्या पत्नीने माझ्याकडून एक लाख रुपये घेतले आहेत. ते पैसे त्या मला परत करीत नाहीत, तसेच माझे कॉलपण घेत नाहीत. तुम्ही मला एक लाख रुपये दिले नाही तर, मी तुमच्या पत्नीचे अश्लील फोटो व्हायरल करून तुमची व तुमच्या पत्नीची बदनामी करतो,' अशी धमकी देत मोबाइल ठेवून दिला. यानंतर थोड्याच वेळात उद्योजक मित्राच्या मोबाइलवर देखील सादी अहेमद या व्यक्तीने कॉल केला. 'तुम्ही तुमच्या मित्राला आणि त्याच्या पत्नीला माझे एक लाख रुपये परत करायचे सांगा नाही तर, मी त्यांचे अश्लील फोटो व्हायरल करून बदनामी करेल,' अशी धमकी दिली. या प्रकरणी उद्योजकाच्या तक्रारीवरून सादी अहेमद नावाच्या आरोपीविरुद्ध खंडणीचा गुन्हा दाखल करण्यात आला असून, सहायक फौजदार कल्याण शेळके तपास करीत आहे.
…
\Bसहा महिन्यांपूर्वी देखील आला होता फोन
\Bउद्योजकाने त्याच्या पत्नीला 'तू सादी अहेमद नावाच्या कोणत्या व्यक्तीकडून पैसे घेतले होते का,' याबाबत विचारणा केली. यावेळी पत्नीने 'सहा महिन्यांपूर्वी मला सादी अहेमद नावाच्या व्यक्तीचा फोन आला होता. त्याने मला एक लाखाची मागणी केली नाही तर, अश्लील फोटो व्हायरल करण्याची धमकी दिल्याचे सांगितले. मात्र, मी अशा कोणत्याही व्यक्तीला ओळखत नसल्याने या प्रकाराकडे दुर्लक्ष केले,' अशी माहिती पतीला दिली.