राजकारणावर अभ्यासक्रम सुरू करण्याची मागणी

औरंगाबाद: राजकारणात प्रवेश करू इच्छिणाऱ्यांसाठी डॉ. बाबासाहेब आंबेडकर मराठवाडा विद्यापीठाने ‘दी ट्रेनिंग स्कूल फॉर एंट्रन्स टू पॉलिटिक्स’ अभ्यासक्रम सुरू करावा, अशी मागणी पुढे आली आहे. औरंगाबादमधील सेवानिवृत्त वरिष्ठ प्राध्यापकांनी ही मागणी विद्यापीठ प्रशासनाकडे केली आहे.
भारतरत्न डॉ. बाबासाहेब आंबेडकर यांच्या १२५व्या जयंतीवर्षाचे निमित्त साधत अशाप्रकारचा अभ्यासक्रम सुरू करावा, असा मानस व्यक्त केला आहे. त्याबाबत कुलगुरूंना निवेदनही सादर करण्यात आले. राजकारणाचे वाढते अध:पतन रोखण्यासाठी पुढारी होऊ इच्छिणाऱ्यांना धडे गिरवणारी एखादी प्रभावशाली प्रशिक्षण संस्था उभारण्याचा घटनाकार डॉ. बाबासाहेब आंबेडकरांचा मानस होता. नव्हे तर ‘दी ट्रेनिंग स्कुल फॉर एंट्रन्स टू पॉलिटिक्स’ या नावाने मुंबईतील सिद्धार्थ कॉलेजमध्ये त्यांनी संस्था सुरू केली होती, परंतु ती फार काळ राहिली नाही. डॉ. बाबासाहेब आंबेडकरांच्या नावाने असलेल्या या विद्यापीठाने अशा प्रकारची संस्था, अभ्यासक्रम पुन्हा सुरू करण्याची मागणी करण्यात आली. निवेदनावर डॉ. एम. ए. वाहूळ, डॉ. आर. के. क्षीरसागर, के. ई. हरिदास, सुभाष लोमटे, डॉ. पी. के. भालेराव, प्रो. अजीत दळवी, डॉ. डी. आर. शेळके, डॉ. अरविंद गायकवाड यांच्या स्वाक्षरी आहेत.

असे देता येईल प्रशिक्षण
या अभ्यासक्रमामुळे राजकाणात प्रवेश करू इच्छिणाऱ्यांना त्या क्षेत्राचे राजकारणाचे ज्ञान, संवैधानिक तत्वज्ञान, संसदीय कार्यपद्धती, मूल्याधिष्ठित राजकारण, आर्थिक धोरण व अंदाजपत्रक, केंद्र राज्य संबंध, कल्याणकारी तरतुदी, परराष्ट्र धोरण आणि वक्तृत्व कला यासंबंधी प्रशिक्षण देता येईल, असेही निवेदनात म्हटले आहे.