म. टा. प्रतिनिधी, पैठण
पंढरपूर येथे १२ जुलै रोजी साजरा होणाऱ्या आषाढी वारी महोत्सवात सहभागी होण्यासाठी संत एकनाथ महाराज यांची पालखी २४ जून रोजी पैठणहून प्रस्थान करणार असल्याची माहिती संत एकनाथ महाराज पालखी प्रमुख रघुनाथ महाराज पांडव यांनी दिली.
संत एकनाथ महाराज यांच्या पादुकांचे सोमवारी (२४ जून) विधिवत पूजन करून पादुका पालखीत ठेवण्यात येतील. भाविकांच्या दर्शनासाठी पालखी गोदावरी नदीच्या तीरावरील पालखी ओट्यावर ठेवण्यात येईल. याच दिवशी सूर्यास्ताच्या वेळी संत एकनाथ महाराज यांच्या पालखीचे प्रस्थान पंढरपूरकडे होईल. १९ दिवसांच्या प्रवासानंतर व मराठवाडा, पश्चिम महाराष्ट्र या भागातील १९ गावांमध्ये मुक्काम केल्यावर ११ जुलै रोजी संत एकनाथ महाराज यांची पालखी पंढरपूरला पोचेल अशी माहिती पालखीप्रमुख पांडव महाराज यांनी दिली.
संत एकनाथ महाराज यांच्या पालखीचा चनकवाडी, हादगाव, लाडजळगाव, कुंडल पारगाव, मुंगूसवाडा, राक्षसभुवन, रायमोह, पाटोदा, दिघोळ, खेर्डा, दांडेगाव, अनाले, परंडा, बिटरगाव, कुर्डू, अरण, करकंब, होळे, शिरढोणमार्गे संत पंढरपूर येथे पोचेल .
११ जुलै रोजी आषाढी वारी महोत्सवात सहभागी झाल्यावर १२ जुलैला पंढरपूर नगर प्रदक्षिणा व १६ जुलै पर्यंत पालखीचा मुक्काम पंढरपूरच्या नाथ मंदिरात राहील. २४ जूनला पंढरपूरला प्रस्थान करणाऱ्या संत एकनाथ महाराज पालखीत मोठ्या संख्येने भाविक व वारकऱ्यांनी सहभागी व्हावे, असे आवाहन पालखी प्रमुख पांडव यांनी केले आहे.
\Bवारीमध्ये पाच रिंगण सोहळे\B
२४ जून ते १२ जुलै यादरम्यान संत एकनाथ महाराज यांच्या पालखीत पाच रिंगण सोहळे होणार आहेत. २७ जून रोजी मिडसावंगी येथे पहिले रिंगण होईल. एक जुलै रोजी पारगाव घुमरे येथे दुसरे, चार जुलै रोजी नागरडोह येथे तिसरे, सात जुलै रोजी कव्हेदंड येथे चौथे व दहा जुलै रोजी पंढरपूर येथे पादुका आरती व पाचवे उभे रिंगण होणार आहे.