म. टा. प्रतिनिधी, औरंगाबाद
वाळू चोरीचे गुन्हे दाखल असलेल्या दोन वाळू माफियांना शहर पोलिसांनी एका वर्षासाठी हद्दपार केले. पोलिस उपायुक्त परिमंडळ एकचे निकेश खाटमोडे पाटील यांनी ही कारवाई केली.
वाळूज पोलिस ठाण्यात संशयित गुन्हेगार गोरख त्र्यंबक पाचरणे (वय ३८) आणि बाबासाहेब एकनाथ पाचरणे (वय ३८ दोघे रा. भोयगाव, ता. गंगापूर) यांच्यावर वाळू चोरीचा गुन्हा दाखल होता. या गुन्ह्यात न्यायालयाने त्यांना ३० जानेवारी रोजी शिक्षा सुनावली आहे. दरम्यान, या दोन्ही आरोपींचा हद्दपारीचा प्रस्ताव वाळूज पोलिस ठाण्याच्या वतीने उपायुक्तांना पाठवण्यात आला होता. या प्रस्तावाची दखल घेत दोन्ही आरोपींना औरंगाबाद शहरातून हद्दपार करण्यात आले आहे. त्यांच्यावर बुधवारी ही कारवाई करण्यात आली. पोलिस आयुक्त चिरंजीवप्रसाद, उपायुक्त निकेश खाटमोडे पाटील, सहायक आयुक्त हनुमंत भापकर यांच्या मार्गदर्शनाखाली पोलिस निरीक्षक संदीप गुरमे, शेख सलीम, आढे आणि म्हस्के यांनी ही कारवाई केली.