तीर्थक्षेत्र विकास आराखडा अडकला

औरंगाबाद : वेरूळ येथील घृष्णेश्वर तीर्थक्षेत्राचा विकास आराखडा तयार करण्यात आला आहे. ६३ कोटी ४८ लाख रुपयांच्या आराखडा मुख्यमंत्र्यांच्या अध्यक्षतेखाली नेमलेल्या उच्चस्तरीय समितीच्या बैठकीसमोर पर्यटन विभागाने सादर केला नाही. त्यामुळे सध्या आराखडा लालफितीत अडकला आहे.
कन्नडच्या उपविभागीय अधिकाऱ्यांनी राज्याचे वित्त व नियोजनमंत्री सुधीर मुनगंटीवार यांच्या अध्यक्षतेखाली वेरूळ येथे झालेल्या बैठकीत घृष्णेश्वर विकास आराखड्याचे सादरीकरण केले होते. मुनगंटीवार यांनी काही बदल करून आराखडा सरकारला सादर करण्याचे निर्देश दिले होते. त्यानुसार नियोजन विभागाने आराखड्यासंदर्भात ३३ विषयांचा समावेश करून घृष्णेश्वर ज्योतिर्लिंग विकास आराखडा सादर करण्याचे कळविले. तब्बल ६३ कोटी ४८ लाखांचा प्रारूप आराखडा नियोजन विभागाकडे सादर करण्यात आला होता. या आराखड्यात रस्त्यांसाठी ४७ कोटी ८४ लाख रुपये, महाराष्ट्र पर्यटन विकास महामंडळाला चार कोटी ७४ लाख रुपये, वन विभागाला एक कोटी ५० लाख रुपये, महाराष्ट्र जीवन प्राधिकरण विभागाला दोन कोटी २६ लाख रुपये, राज्य विद्युत महामंडळाला दोन कोटी ७५ लाख रुपये, कार्यालयीन व इतर खर्चासाठी चार कोटी १५ लाख आणि जाहिरातीसाठी २२ लाख रुपये निधी देण्याचा प्रस्ताव पर्यटन विभागाला सादर केला आहे. पर्यटन विभागामार्फत आराखड्यानुसार विकासकामे करण्यास मान्यता दिली जाणार असल्यामुळे आराखडा मान्यतेसाठी उच्चाधिकार समितीकडे सादर करण्यात आला आहे.

आराखड्याला प्रतीक्षा
मुख्यमंत्र्यांच्या अध्यक्षतेखालील उच्चाधिकार समितीच्या बैठकीसमोर विकास आराखडा सादर केला जाणार असला तरी उच्चाधिकार समितीची बैठक झाली नाही. त्यामुळे आराखडा लालफितीत अडकला आहे. बैठकीत आराखड्याला मान्यता मिळाल्यानंतरच नियोजन व वित्त विभागाकडून निधीची तरतूद केली जाईल, असे सूत्रांनी सांगितले.