पऱ्हाट्यांच्या गंजी साठवू नका

औरंगाबाद : कापूस पिकांवर सेंद्रीय बोंडअळीने मोठे नुकसान झाले आहे. त्याचा पुढील हंगामात पुन्हा उद्रेक होऊ नये, त्यासाठी फरदड न घेता पऱ्हाट्या रोटाव्हेटरव्दारे जमिनीत गाडाव्यात, असे आवाहन कृषी विभागाने केले आहे. त्यामुळे शेंदरी बोंडअळीचे जीवनचक्र खंडित होईल, असेही कृषी विभागाकडून सांगण्यात येत आहे.

मराठवाड्यात १६ लाखांहून अधिक हेक्टर क्षेत्रावर कापसांची लागवड झाली, पण बोंडअळीमुळे शेतकऱ्यांचे उभे कापूस पीक वाया आहे. आगामी खरीप हंगामात बोंडअळीचा प्रादुर्भाव होऊ नये, यासाठी कृषी विभागाने प्रयत्न सुरू केले आहे. कापूस पीक वेळेवर म्हणजे डिसेंबरअखेर काढून टाकावे, शेत स्वच्छ करावे. मार्च किंवा एप्रिलपर्यंत पऱ्हाट्या शेतातच उभ्या ठेवू नयेत. काढणीसाठी मल्टीक्रॉप श्रेडरचा वापर केल्यास किडग्रस्त बोंडांचा नायनाट करता येईल. बीटी कॉटन लावताना रेफ्युजी (नॉन बीटी) लावा, गुलाबी बोंडअळीचे एकात्मिक व्यवस्थापन कसे करावे, असे आवाहन कृषी विभागाने केले आहे.