म. टा. प्रतिनिधी, औरंगाबाद
मोकाट कुत्र्यांच्या हल्यात जीव गमावलेल्या अक्षरा वावरे या मुलीच्या कुटुबियांना आर्थिक मदत द्यावी, या घटनेस जबाबदार असणाऱ्यांवर कारवाई करावी, अशी मागणी वॉर्डातील सर्वपक्षीय कार्यकर्त्यांनी केली. सोमवारी भाजप, शिवसेना, काँग्रेस, राष्ट्रवादी काँग्रेस अशा सर्वपक्षीय पदाधिकाऱ्यांनी एकत्र येत महापौर नंदकुमार घोडेले यांची भेट घेतली.
मुकुंदवाडी येथील अक्षरा राजू वावरे या अडीच वर्षीय मुलीला २५ ऑगस्ट रोजी मोकाट कुत्र्याने चावा घेतला. उपचारादरम्यान तिचे प्राण गेले. वॉर्डातील नागरिकांनी वारंवार मोकाट कुत्र्यांबाबत पालिका प्रशासनाकडे तक्रार केल्या होत्या. मात्र, प्रशासनाकडून दुर्लक्ष करण्यात आल्याचा आरोप पदाधिकाऱ्यांनी केला. या सर्व प्रकारास पूर्णपणे पालिका प्रशासनाचा ठिसाळ कारभार जबाबदार असून, त्यामुळेच निष्पाप मुलींची बळी गेला. पालिकेने त्या मुलीच्या कुटुंबास आर्थिक सहाय्य म्हणून दहा लाख रुपयांची नुकसान भरपाई द्यावी, या घटनेस जबाबदार असलेल्या श्वान पथकातील अधिकाऱ्यांवर कारवाई करावी, अशी मागणी करण्यात आली. यावेळी शिवसेनेचे प्रशांत कुऱ्हे, भाजपचे सुनील जगताप, काँग्रेस सेवा दलाचे राहुल चव्हाण, राष्ट्रवादी काँग्रेसचे प्रशांत जगताप आणि महाराष्ट्र नवनिर्माण सेनेचे शेखर रणखांब यांची प्रमुख उपस्थिती होती.
\Bस्थायी समितीतही गाजला विषय
\Bस्थायी समितीच्या बैठकीतही शहरातील मोकाट कुत्र्यांचा विषय गाजला. मोकाट कुत्र्यांच्या हल्यात अनेक निष्पाप जीवांचा बळी जात आहे. यात सर्वस्वी मनपाची चूक आहे. त्यामुळे प्रशासनावर सदोष मनुष्यवधाचा गुन्हा दाखल करावा, अशी मागणी स्थायी समितीच्या बैठकीत सोमवारी नगरसेवकांनी केली. हा विषय अत्यंत गंभीर असल्याने आयुक्तांसोबत बैठक घेऊ, तोपर्यंत प्रशासनाने आवश्यक उपाययोजना कराव्यात, असे सभापतींनी आदेश दिले.