\Bम. टा. प्रतिनिधी, औरंगाबाद
\Bएमआयएम पक्षप्रमुख असदुद्दीन ओवेसी यांनी एक ऑडिओ क्लिप पाठवून नगरसेवक आणि पदाधिकाऱ्यांची खरडपट्टी काढली असून, पक्षात बेशिस्त खपवून घेणार नसल्याचा इशारा दिला आहे.
पक्षाच्या वतीने नुकत्याच शहरात विधानसभेसाठी मुलाखती घेण्यात आल्या. त्यात एका इच्छुकाने मुलाखत दिली. तेव्हा काही नगरसेवक आणि पदाधिकाऱ्यांनी त्या व्यक्तीला उमेदवारी देवू नका, असे पत्र ओवेसी यांना पाठवले. त्यामुळे ओवेसी यांचा भडका उडाला. त्यांनी तातडीने एक ऑडिओ क्लिप पाठवून दिली. त्यात, 'विधानसभा निवडणुकीत उमेदवार कोण असावा, याचा निर्णय घेण्याचा अधिकार पक्षाला आहे. नगरसेवक, पदाधिकारी या नात्याने तुम्ही फक्त सल्ला द्या किंवा सूचना करा. मात्र, सह्यांची मोहीम घेऊन जर पक्षावर दबाव आणण्याचा प्रयत्न केला तर, तो कदापी सहन करणार नाही. तुमच्या सूचनांचा आदर करू. मात्र, असे चुकीचे पायंडे पाडू नका. पक्ष देईल त्याच उमेदवाराला निवडून आणण्यासाठी काम करावे. प्रत्येकाला इच्छा असावी, पण त्यामुळे पक्षाचे नुकसान होणार असेल तर ते सहन करणार नाही,' अशा शब्दांत नगरसेवक, पदाधिकाऱ्यांना डोस दिला. विशेष म्हणजे ही ऑडिओ क्लिप व्हायरल होता कामा नये, अशी तंबीही दिल्याचे समजते. दरम्यान, विधानसभेसाठी ज्यांनी उमेदवारी मागितली आहे, त्यांची माहितीही पक्षाने स्वत:च्या यंत्रणेने गोळा केल्याचे समजते. त्यातून योग्य व्यक्ती पाहूनच उमेवारी घोषित करण्यात येणार आहे.