पानतावणेंचा पद्मश्री पुरस्कार नातेवाईकांकडे सुपुर्द

औरंगाबादः

पहिल्या मराठी विश्व साहित्य संमेलनाचे अध्यक्ष, अस्मितादर्श चळवळीचे जनक, ज्येष्ठ विचारवंत, लेखक दिवंगत डॉ. गंगाधर पानतावणे यांना सरकारने २५ जानेवारी २०१८ रोजी जाहीर केलेला पद्मश्री पुरस्कार त्यांच्या नातेवाईकांकडे विभागीय आयुक्त डॉ. पुरूषोत्तम भापकर, जिल्हाधिकारी उदय चौधरी यांनी सन्मानपूर्वक सुपुर्द केला. पुरस्कार डॉ. पानतावणे यांच्या कन्या नंदिता, निवेदिता यांनी स्वीकारला.

राष्ट्रपती रामनाथ कोविंद यांच्याहस्ते हा पुरस्कार डॉ. पानतावणे यांना २१ मार्च २०१८ रोजी वितरीत करण्यात येणार होता. परंतु आजारपणामुळे पुरस्कार स्वीकारण्यासाठी डॉ. पानतावणे उपस्थित राहू शकले नाहीत. त्यानंतर २७ मार्च २०१८ रोजी त्यांचे निधन झाले. म्हणून हा पुरस्कार स्वत: विभागीय आयुक्त डॉ. भापकर, जिल्हाधिकारी चौधरी यांनी डॉ. पानतावणे यांच्या घरी जाऊन सन्मानाने सुपूर्द केला.