केंद्रीय मंत्र्यांच्या वक्तव्यावर डॉ. काकोडकर यांची टोला

'आपल्याला मागे जायचे की पुढे जायचे?'

म. टा. प्रतिनिधी, औरंगाबाद

'एकदा एखाद्या संशोधकाने मांडलेल्या सिद्धांतामागे संशोधन असते. संशोधनांती मांडलेल्या सिद्धांताला ठोस आधार असतो. असे असूनही कोणी सिद्धांत नाकारत असेल तर ते योग्य नाही. आपल्याला पुढे जायचे आहे की मागे जायचे आहे? ते ठरवा,' असे म्हणत डॉक्टर अनिल काकोडकरांनी केंद्रीय मनुष्यबळ विकासमंत्री सत्यपाल सिंह यांना टोला लगावला आहे.

छत्रपती शाहू महाराज शिक्षण संस्थेच्या इंजिनिअरिंग कॉलेजमधील 'इंडस्ट्रिअल अॅकेडेमिया समिट २०१८'च्या समारोप कार्यक्रमासाठी ते सोमवारी आले होते. त्यानंतर पत्रकारांनी त्यांच्याशी संवाद साधला. औरंगाबादेत वैदिक संमेलनात केंद्रीय राज्यमंत्री डॉ. सत्यपालसिंह यांनी डार्विनच्या सिद्धांतावर केलेल्या वादग्रस्त विधानासंबंधी एक शास्त्रज्ञ म्हणून काय वाटते, असे विचारल्यावर, ते म्हणाले, 'कुठलेही सिद्धांत हे वैज्ञानिक पुरावे, दाखले यांवर सिद्ध करावे लागतात. असं आहे, आपल्याला ठरवायला पाहिजे की, आपल्याला पुढे जायचे की मागे राहायचे? हा खरा मुद्दा आहे.'

भारताला ज्ञानाची परंपरा आहे. ज्ञान, संस्कृती यांच्या आधारावर आपण पुढे जायला हवे. ते सगळे तावून सुलाखून बघावे लागते. तसे न करता तुम्ही मला सांगितले म्हणून मी तुमच्यावर विश्वास ठेवणे हा काही ज्ञानाचा मार्ग नाही. ते तपासून पाहावे लागेल. ज्या गोष्टी मांडल्या ओहत, म्हणजे ती फक्त 'थिअरी' नाहीत त्याला वैज्ञानिक पुरावे आहेत. त्याआधारे अंदाज बांधले गेले आहे. ते खरे ठरले आहेत. आता माझ्याकडे काही जुन्या गोष्टी आहेत. त्यासाठी माझ्याकडे आधार सापडत नाही, असे म्हणणे चूक आहे, असेही डॉ. काकोडकर म्हणाले.