म. टा. प्रतिनिधी, औरंगाबाद
औरंगाबाद पूर्व विधानसभा मतदारसंघातील 'एमआयएम'चे उमेदवार डॉ. गफ्फार कादरी हे नेमके कोणत्या पक्षाकडून उमेदवारी दाखल करणार आहे, असा संभ्रम निर्माण झाला आहे. वंचित बहुजन आघाडीच्या यादीत औरंगाबाद पूर्वमधून डॉ. गफ्फार कादरी हे उमेदवार असल्याचे सोशल मीडियावरून पसरविण्यात आलेल्या यादीत म्हटले आहे. त्यामुळे हा संभ्रम निर्माण झाला आहे.
वंचित बहुजन आघाडी आणि 'एमआयएम' यांची आघाडी जागा वाटपावरून संपुष्टात आली आहे. जागा वाटपाच्या चर्चेला 'एमआयएम'तर्फे डॉ. कादरी उपस्थित होते. डॉ. कादरी यांच्याकरिता अॅड. प्रकाश आंबेडकर यांची सभाही घेण्यात आली. यामुळे वंचित बहुजन आघाडीने अद्याप औरंगाबाद पूर्व मतदारसंघातून उमेदवार दिलेला नाही. उलट 'वंबआ'तर्फे सोशल मीडियावर फिरत असलेल्या एका यादीत डॉ. गफ्फार कादरी हे 'वंबआ'चे उमेदवार असल्याचे म्हटले आहे. त्यामुळे डॉ. कादरी हे नेमके कोणत्या पक्षाचे उमेदवार याबद्दल संभ्रम निर्माण झाला आहे.
औरंगाबाद पूर्व मतदारसंघातून 'एमआयएम'तर्फे डॉ. गफ्फार कादरी यांची उमेदवारी जाहीर केली आहे. त्यांनी पक्षाकडून ए-बी फार्म घेतला आहे. ते 'एमआयएम'चेच उमेदवार असून वंचित बहुजन आघाडीकडून त्यांना पाठिंबा मिळत असेल, तर चांगलेच आहे.
-इम्तियाज जलील, प्रदेशाध्यक्ष, एमआयएम