म. टा. प्रतिनिधी, औरंगाबाद
औरंगाबादहून देशांतर्गत विमान सेवा वाढलेल्या आहेत. आगामी काळात औरंगाबाद शहरातून थेट दुबईसह सिंगापूरलाही कनेक्शन देण्याची घोषणा विमान कंपन्यांकडून करण्यात आली आहे. या शिवाय आत औरंगाबाद ते थेट तिरुपतीचेही कनेक्शन औरंगाबादकरांना उपलब्ध झाले आहे.
औरंगाबाद विमानतळाहून सध्या दिल्ली, अहमदाबाद, हैदराबाद आणि बेंगळूरू येथे विमान सेवा सूरू आहे. याशिवाय उदयपूरलाही विमान सेवा सुरू आहे. स्पाइस जेटच्या दिल्ली - विमानामुळे औरंगाबादच्या विमान प्रवाशांना दिल्लीहून १२ शहरांसाठी आणि दोन आंतरराष्ट्रीय विमान कनेक्शन मिळविणे सोपे झालेले आहे. त्याच प्रमाणे स्पाइस जेटची अहमदाबाद विमान सेवा सुरू करण्यात येणार आहे. या अहमदाबाद विमान सेवेमुळे गुजरातला जाणाऱ्या; तसेच राजस्थानसह अन्य शहरांना जाण्यासाठी विमान सेवा उपलब्ध होणार आहे. दिल्ली आणि अहमदाबादसह हैदराबाद आणि बेंगळुरू या शहरांनाही औरंगाबादचे विमान कनेक्शन असल्यामुळे दक्षिण भारतात जाण्यासाठी विमान सेवा उपलब्ध होत आहे.
आगामी फेब्रुवारी महिन्यापासून इंडिगोचे विमान सुरू होणार आहे. इंडिगोच्या बेंगळुरू या विमान सेवेमुळे कोलंबो आणि सिंगापूरचे विमान कनेक्शन उपलब्ध होणार आहे. इंडिगोचे औरंगाबाद मुंबई हे विमान आगामी काही दिवसांत सुरू केले जाणार आहे. औरंगाबाद - मुंबई कनेक्शनमुळे औरंगाबाद ते दुबई हे एक विमान कनेक्शन उपलब्ध होणार असल्याची शक्यता वर्तविण्यात येत आहे. औरंगाबादच्या विमान प्रवाशांना कमी किमतीत आता मुंबईमार्गे थेट औरंगाबाद ते दुबईपर्यंतचा प्रवास करता येणार आहे. या सोयी सुविधेमुळे आगामी काळात औरंगाबाद विमानतळाहून आंतरराष्ट्रीय विमान सेवा सुरू करण्यासाठी पोषक वातावरण आहे किंवा नाही. याचही चाचपणी केली जाणार असल्याची माहिती इंडिगोच्या सूत्रांनी दिली.
…
औरंगाबाद तिरुपतीलाही थेट कनेक्शन
औरंगाबादहून बेंगळुरूला इंडिगोची विमान सेवा सुरू होणार आहे. या विमान सेवेमुळे औरंगाबादच्या प्रवाशांना औरंगाबादहून थेट तिरुपतीचे तिकीट घेऊन बेंगळुरूमार्गे तिरुपतीपर्यंतचा प्रवास करता येणार आहे. औरंगाबाद - तिरुपती - औरंगाबाद या विमानातून प्रवासासाठी दहा हजार ७० रुपये एका प्रवासाला पूर्ण प्रवासासाठी खर्च येणार आहे. औरंगाबादहून थेट तिरुपतीची व्यवस्था झाल्याने तिरुपतीला जाणाऱ्या औरंगाबादच्या प्रवाशांना याचा लाभ मिळणार आहे.