म. टा. प्रतिनिधि, औरंगाबाद
औरंगाबाद शहर पोलिस दलात देखील करोना विषाणूने शिरकाव केला आहे. पोलिस दलात मुख्यालयातील एका निरीक्षकासह विविध पोलिस ठाण्यांच्या आठ जणांना 'करोना'चा संसर्ग झाला आहे. यांच्यावर विविध हॉस्पिटलमध्ये उपचार सुरू असून, एक कर्मचारी करोनामुक्त झाल्यामुळे त्याला घरी सोडण्यात आले आहे, अशी माहिती पोलिस मुख्यालयातून देण्यात आली.
करोनाबाधितांमध्ये मुख्यालयातील एक पोलिस निरीक्षक, जिन्सी पोलिस ठाण्यातील दोन कर्मचारी, पोलिस मुख्यालयातील एक पुरुष कर्मचारी, दोन महिला कर्मचारी, वेदांतनगर, वाहतूक शाखा आणि वाळूज एमआयडीसी पोलिस ठाण्यातील एका कर्मचाऱ्याचा समावेश आहे. या 'करोना पॉझिटिव्ह' रुग्णांवर महाराष्ट्र पोलिस कुटुंब आरोग्य योजनेंतर्गत शासकीय आणि खासगी हॉस्पिटलमध्ये उपचार सुरू आहेत. यापैकी एक रुग्ण करोनामुक्त झाला असून, त्याला हॉस्पिटलमधून घरी सोडण्यात आले असून, 'होम क्वारटाइंन' करण्यात आले आहे. या बाधित कर्मचाऱ्यांच्या हॉस्पिटलला पोलिस आयुक्त चिरंजीवप्रसाद, उपायुक्त मीना मकवाना यांनी भेट देऊन डॉक्टरांच्या पथकांशी चर्चा केली. त्यांच्यासाठी स्वतंत्र वॉर्ड करण्यात आला आहे. पोलिस कर्मचाऱ्यांनी कर्तव्य बजवानाता सर्व सुरक्षिततेची काळजी घेण्याचे आवाहन पोलिस मुख्यालयातून करण्यात आले आहे.