आठ हजारांची लाच; जमादार गजाआड

औरंगाबाद : देशी दारुच्या दुकानाच्या मॅनेजरकडून आठ हजारांची लाच घेताना पुंडलिकनगर पोलिस चौकीतील जमादाराला लाच लुचपत प्रतिबंधक विभागाने अटक केली. मंगळवारी दुपारी सव्वाचार वाजता पुंडलिकनगर चौकीत ही कारवाई करण्यात आली.
मुकुंदवाडी पोलिसांनी तीन दिवसांपूर्वी अवैध दारू विक्रेत्याला अटक केली होती. या गुन्ह्याचा तपास पोलिस जमादार संजय नागोराव सोनवणे (वय ४८, रा. मिरजगावे नगरी, बीड बायपास) यांच्याकडे होता. एन चार भागात देशीदारुच्या विक्रीचे दुकान आहे. या दुकानाच्या मॅनेजरला जमादार सोनवणे यांनी ‘आरोपीने माल तुमच्या दुकानातून खरेदी केल्याची माहिती दिल्याचे सांगितले आहे. तुम्हाला सहआरोपी करायचे नसेल तर दहा हजार रुपये द्यावे लागतील’, असे सांगत लाचेची मागणी केली. लाच देण्याची इच्छा नसल्याने मॅनेजरने लाच लुचपत प्र‌तिबंधक विभाग गाठून तक्रार दिली होती. या मागणीची पडताळणी करण्यात आली. पडताळणीमध्ये जमादार सोनवणे यांनी तडजोडीअंती आठ हजार रुपयाच्या लाचेची मागणी केली. मंगळवारी दुपारी पुंडलिकनगर पोलिस चौकीत ही रक्कम आणून देण्यास सांगितले. लाच लुचपत प्रतिबंधक विभागाने सापळा रचून सोनवणेला लाच घेताना पकडले. त्याच्याविरुद्ध मुकुंदवाडी पोलिस ठाण्यात गुन्हा दाखल करण्यात आला. ही कारवाई उपाअधिक्षक विवेक सराफ, उत्तम टाक, निरीक्षक सम्राटसिंग राजपूत, हरीभाऊ कुऱ्हे, अश्वलिंग होनराव, सचिन शिंदे, बाळासाहेब महाजन, नितीश घोडके, दिलीप राजपूत आदींनी केली.