कार्यकारी अभियंत्यास लाच घेताना अटक

जालना : जलयुक्त शिवार अभियानाच्या सिमेंट नाल्याच्या कामाला मुदतवाढ मिळण्यासाठी तक्रारदारकडून एक लाख रुपयांची लाच घेतांना लघु सिंचन विभागाचे कार्यकारी अभियंता धनंजय कोंडेकर यास लाचलुचपत प्रतिबंधक विभागाच्या अधिकाऱ्यांनी सोमवारी पकडले.
भारासवाडा येथील सिमेंट नाला बंधाऱ्याची मुदत तीन महिने होती, परंतु पावसाळा व त्यापुर्वी पाणी टंचाई असल्यामुळे त्याचे काम बाकी होते. गुत्तेदाराने मुदतवाढ देण्याची मागणी कोंडेकर यांच्याकडे केली. त्यांनी एक लाख रुपये मागितले. गुत्तेदाराने लाचलुचपत विभागाकडे तक्रार केली. त्यानुसार २४ एप्रिल रोजी लाचलुचपत विभागाने लघुसिंचन कार्यालयात सापळा रचला. तक्रारदाराकडून प्रथम ८८ हजार रुपये व त्यानंतर १२ हजार असे एक लाख रुपये स्वीकारताना अधिकाऱ्यांनी पकडले.
पोलिस अधीक्षक डॉ. श्रीकांत परोपकारी, अप्पर पोलिस अधीक्षक डी. डी. गवारे यांच्या मार्गदर्शनाखाली उपअधीक्षक हेमंत सोमवंशी, पोलिस निरीक्षक विकास पाटील, अनिता वराडे, पोलिस नाईक गणेश पडुळे, रवींद्र देशमुख, संदीप आव्हाळे, चालक संदीप चिंचोले यांनी कारवाई केली.