म. टा. प्रतिनिधी, औरंगाबाद
'ब्रँड कॅनडा' या उद्योजक व विद्यार्थ्यांसाठी नुकत्याच झालेल्या परिषदेत शासकीय अभियांत्रिकी महाविद्यालयाच्या विद्यार्थ्यांनी उत्स्फूर्तपणे सहभाग नोंदवला. ही परिषद हॉटेल ताज येथे पार पडली.
परिषदेत कॅनडा सरकारचे वाणिज्य मंत्री अँड्र्यू स्मिथ यांनी परिषेदेच्या सुरुवातीच्या सादरीकरणामध्ये कॅनडा सरकारकडून भारतीय उद्योजकांना व विद्यार्थ्यांना उद्योग निर्मितीच्या अनेक संधी आहेत आणि त्यासाठी त्यांनी चेन्नई, बंगळुरू, पुणे, दिल्ली येथे सेंटर उभारण्याचा मानस व्यक्त केला. कॅनडा हे सर्वांना राहण्यासाठी, उद्योग मिर्मितीसाठी, तसेच स्टार्ट अप, उच्च शिक्षण, पर्यटन, सुरक्षेच्या दृष्टिकोनातून व नैसर्गिक वातावरण अतिशय सुदृढ असल्याचेही ते म्हणाले. शासकीय अभियांत्रिकीच्या इंडस्ट्री इंस्टिट्यूट इंटरअॅक्शनच्या १५ विद्यार्थ्यांनी अधिष्ठाता डॉ. आर. एम. दमगीर यांच्या मार्गदर्शनाखाली सहभाग नोंदविलाय या वेळी विद्यार्थ्यांनी कॅनडाच्या वाणिज्य मंत्र्यांशी सखोल चर्चाही केली. शुभम मोरे, प्रज्ञा माहिरे, मयुरी, किरण भिंगारे यांनी व्हिसा मिळविण्यापासून ते उच्चशिक्षण व संशोधनाच्या संधी व शिष्यवृतीबाबत आणि उद्योग स्थापन करणे व त्यासाठी लागणारी मदत, स्टार्टअपच्या सुविधा आदींवर विस्तृत चर्चा केली. यानिमित्त विद्यार्थ्यांनी नियमाप्रमाणे आवश्यक त्या सर्व कागदपत्रांप्रमाणेच 'इंग्रजी लेव्हल-फाइव्ह'ची परीक्षा उत्तीर्ण होणे अत्यावश्यक असल्याचे स्मिथ यांनी सांगितले. या प्रसंगी, विद्यार्थ्यांना चांगल्या संधी निर्माण करुन देण्याची ग्वाही डॉ. दमगीर यांनी दिली. परिषदेसाठी डॉ. संजय शिंदे, प्रा. किशोर मडावी, प्रा. सपकाळ, प्रा. बाचावाड आदींनी पुढाकार घेतला.