म. टा. प्रतिनिधी, औरंगाबाद
शहरातील औद्योगिक संघटनांनी एकत्र येत ‘मराठवाडा एन्व्हायर्मेंटल केअर क्लस्टर’ (एमइसीसी) या विशेष हेतू कंपनीची (एसपीव्ही) स्थापना केली आहे. अशा प्रकारचे क्लस्टर देशात पहिल्यांदा स्थापन केल्याची माहिती क्लस्टरचे अध्यक्ष बी. एस. खोसे यांनी शनिवारी पत्रकार परिषदेत दिली. या क्लस्टरच्या माध्यमातून पावसाळ्यात वाळूज औद्योगिक वसाहतीत तीन लाख झाडे लावण्यात येणार आहेत.
क्लस्टरचे अध्यक्ष खोसे म्हणाले, ‘या उपक्रमात सीआयआय, सीएमआयए, एमआयडीसी, महाराष्ट्र प्रदूषण नियंत्रण मंडळ, बजाज अॅटो, बजाज अॅटो व्हेंडर्स असोसिएशन सहभागी झाली आहेत. क्लस्टरच्या माध्यमातून औद्योगिक क्षेत्रातील दहा हजार नागरिकांना २६ जानेवारी २०१६ रोजी स्वच्छतेची शपथ देण्यात आली. क्लस्टरचा मुख्य उद्देश पर्यावरण संरक्षण व संवर्धन असा आहे. येत्या काळात तीन लाख झाडे लावण्याचे ठरविण्यात आले आहे. वाळूज औद्योगिक वसाहतीत रस्त्याच्या दुतर्फा झाडे लावली जाणार आहेत. त्यासाठी तारेचे कुंपण घालण्यात आले आहे. क्लस्टरमध्ये वाळूज मधील दीड ते दोन हजार कारखाने सहभागी झाले असून लावण्यात आलेली झाडे त्यांना दत्तक दिली जाणार आहेत. त्यामुळे लावलेली झाडे शंभर टक्के जगतील. रस्त्याच्या दुतर्फा झाडे लावण्याबरोबरच लँडस्केपिंग करणे, मोकळ्या जागेत वृक्षारोपण करणे हे उपक्रम देखील हाती घेतले जाणार आहेत,’ असा उल्लेख त्यांनी केला. एन्व्हायर्मेंटल क्लस्टर भारतात सर्वप्रथम औरंगाबादमध्ये स्थापन झाल्याचा दावा सीएमआयएचे अध्यक्ष आशिष गर्दे यांनी केला. पत्रकार परिषदेला विजय लेकुरवाळे, रवींद्र कुलकर्णी, श्रीकांत मुंदडा, रवींद्र कोंडेकर, नारायण पवार, अनिल पाटील, अशोक काळे, राहुल मोगल, एमआयडीसीचे प्रादेशिक अधिकारी राजेंद्र गावडे आदी उपस्थित होते.