म. टा. प्रतिनिधी, औरंगाबाद
महापालिकेच्या किलेअर्क येथील कोव्हिड केअर सेंटरमध्ये उपचारासाठी ठेवण्यात आलेले हर्सूल कारागृहातील दोन करोना पॉझिटिव्ह कैदी खिडकीचे गज वाकवून पळून गेले. अक्रम खान (वय २७, रा. जटवाडा) आणि सय्यद सैफ (वय २४ रा. कटकट गेट), अशी या दोन कैद्यांची नावे, असून करोना पॉझिटिव्ह कैद्यांनी पळ काढल्याने कारागृह व शहर पोलिस विभागासह आरोग्य विभागाचे धाबे दणाणले आहे.
कारागृह पोलिसांनी दिलेल्या माहितीनुसार, हर्सूल येथील मध्यवर्ती कारागृहातील करोना पॉझिटिव्ह २९ कैद्यांना करोनाची बाधा झाली आहे. त्यांच्यापैकी १९ कैद्यांना उपचारासाठी किलेअर्क येथील सामाजिक न्याय विभागाच्या वसतिगृहातील केंद्रात दाखल करण्यात आले. या कैद्यांना वसतिगृहाच्या पहिल्या मजल्यावर ठेवले आहे. त्यांच्या सुरक्षेसाठी मध्यवर्ती कारागृहाचे सहा पोलिस आणि एक अधिकारी तैनात केला आहे. येथील एका खोलीच्या खिडकीचे लोखंडी गज वाकवून अक्रम खान आणि सय्यद सैफ या कैद्यांनी रविवारी रात्री अकराच्या सुमारास पळ काढला. त्यांचा कारागृहाच्या पोलिसांनी पाठलाग केला, मात्र अंधारात ते दोघे हिमायतबाग परिसरात घुसले व तेथून पळून जाण्यात यशस्वी झाले. या कैद्यांविरुद्ध बेगमपुरा पोलिस ठाण्यात गुन्हा दाखल करण्यात आला आहे. या घटनेनंतर वसतिगृहातील बंदोबस्त वाढविण्यात आला असून कारागृह पोलिस आणि शहर पोलिसांकडून पळून गेलेल्या दोघांचा शोध सुरू आहे.
…
\Bचौकशीसाठी समिती; एक निलंबित
\Bया कैद्यांची जबाबदारी असलेल्या एका कारागृह पोलिसाला हर्सूल कारागृह अधीक्षकांनी तत्काळ निलंबित केल्याचे सूत्रांनी सांगितले. प्रशांत देवकर, असे कर्मचाऱ्याचे नाव आहे. या प्रकरणाच्या चौकशीसाठी एक सदस्यीय समिती नियुक्त करण्यात आली आहे.
…
\Bदोघे अट्टल गुन्हेगार \B
पळालेला करोना पॉझिटिव्ह कैदी अक्रम खान अय्यान खान हा खुनप्रकरणातील आरोपी आहे, तर सय्यद सैफ सय्यद असद हा फसवणूक प्रकरणातील आरोपी आहे.
…
\Bचार पथके स्थापन \B
पळालेल्या दोन कैद्यांचा शोध घेण्यासाठी शहर पोलिसांचे चार पथक स्थापन करण्यात आले आहेत. त्यापैकी तीन पथके गुन्हे शाखेची, तर एक पथक बेगमपुरा पोलिस ठाण्याचे आहे. याशिवाय सर्व तपासणी नाक्यांवर 'अलर्ट' जारी करण्यात आला आहे.