म. टा. प्रतिनिधी, औरंगाबाद
सप्टेंबर महिन्यात मराठवाड्यात पावसाने दमदार हजेरी लावली असली तरी अद्यापही बीड आणि उस्मानाबादमध्ये चारा छावण्या सुरू आहेत. या छावण्या ३० सप्टेंबरनंतर बंद करण्यात येणार आहेत. त्यामुळे या छावण्या सुरू ठेवण्याबाबत सोमवारी (३० सप्टेंबर) निर्णय होण्याची शक्यता आहे. दरम्यान, बीड जिल्हाप्रशासनाने त्यांच्या जिल्ह्यातील चारा छावण्या सुरू ठेवण्यात याव्या अशी शासनाकडे मागणी केली असल्याचे सूत्रांनी सांगितले. सध्या बीड जिल्ह्यातील ४७ चारा छावण्यांमध्ये २३ हजार १४८ तर उस्मानाबाद जिल्ह्यातील २२ छावण्यांमध्ये १२ हजार १५७ लहान मोठ्या जनावरांच्या चारा पाण्याची सोय करण्यात येत आहे.
मराठवाड्यात पाऊस सरासरीच्या जवळपास असला तरी पिण्याच्या पाण्याचा मात्र दुष्काळ आहे. राज्यातील कमी पर्जन्यमान असलेल्या भागांमध्ये चाऱ्याचा प्रश्न निर्माण होऊ नये म्हणून त्या भागातील चारा छावण्यांना शासनाने ऑगस्ट अखेरीस महिनाभराची मुतदवाढ दिली होती. येत्या काही दिवसांत मराठवाड्यातून चारा छावण्या काढल्या जातील. मात्र, बीड आणि उस्मानाबाद जिल्ह्यात समाधानकारक पाऊस झालेला नाही. बीड जिल्ह्यात केवळ ५५.८८ तर उस्मानाबाद जिल्ह्यात वार्षिक सरासरीच्या तुलनेत ६०.६६ टक्केच पाऊस झाला आहे. दोन्ही जिल्ह्यांमध्ये मोठ्या प्रणावर जनावरे चारा छावण्यांवर अवलंबून आहेत. त्यामुळे या जिल्ह्यातील चारा छावण्या सुरू राहतील की नाही याबाबत ३० सप्टेंबर रोजी निर्णय होण्याची शक्यता आहे.
बीड जिल्ह्यात सुरू असलेल्या चारा छावण्यांमध्ये बीड तालुक्यात सुरू असलेल्या एका चारा छावणीमध्ये ३४०, आष्टीमधील ४० छावण्यांमध्ये २० हजार ६४७, वडवणीमधील एका चारा छावणीत २०८ तर गेवराई तालुक्यामध्ये सुरू असलेल्या पाच चारा छावण्यांमध्ये एक हजार ९५३ लहान मोठ्या जनावरांच्या चारा पाण्याची सोय करण्यात आली आहे. उस्मानाबाद जिल्ह्यातील भूम तालुक्यातील तीन चारा छावण्यांमध्ये एक हजार ८७८, परंडामधील १३ छावण्यांमध्ये सात हजार ६८० , कळंब मधील पाच छावण्यांमध्ये दोन हजार १३१ आणि वाशी तालुक्यातील एका चारा छावणीमध्ये ४६८ लहान-मोठी जनावरे आहेत.
मराठवाड्यात अत्यल्प पावसामुळे पशुधन जगवण्यासाठी शासनाने गेल्या पाच महिन्यांपासून चारा छावण्यांची सोय केली आहे.
जिल्हानिहाय स्थिती
जिल्हा................... चारा छावण्या........... एकूण जनावरे
बीड........................४७........................२२१४८
उस्मानाबाद..............२२..........................१२१५७
एकूण...................६९..........................३०३०५