म. टा. प्रतिनिधी, औरंगाबाद
तंत्रशिक्षण (पॉलिटेक्निक) अभ्यासक्रमाच्या प्रवेश प्रक्रियेत अर्ज नोंदणीसाठी विद्यार्थ्यांना २० जुलैपर्यंत मुदत देण्यात आली आहे. सुरुवातीच्या वेळापत्रकानुसार सोमवारपर्यंत अर्ज भरणे व निश्चितीची मुदत होती. आजपर्यंत सहा हजार २८९ विद्यार्थ्यांनी अर्ज केले आहेत.
राज्य प्रवेशपूर्व सामाईक परीक्षा कक्षाने प्रवेश प्रक्रियेचे वेळापत्रकात अर्ज नोंदणी व निश्चितीसाठी मुदतवाढ देण्याचा निर्णय घेतला आहे. पूर्वी २१ जून ते १६ जुलैपर्यंत यासाठी मुदत होती. आता आणखी चार दिवसांची मुदतवाढ देण्याचा निर्णय घेण्यात आला. त्यामुळे नव्या वेळापत्रकामुळे विद्यार्थ्यांना २० जुलैपर्यंत अर्ज भरता येणार आहेत. जातवैधता प्रमाणपत्र सुरुवातीला बंधनकारक करण्यात आले होते. त्यामुळे राज्यभर गोंधळ उडाला. शाळा, महाविद्यालय स्तरावरून प्रस्ताव आल्यानंतर वैधता प्रमाणपत्राची प्रक्रिया होते. मात्र, सुरुवातीला याचा विसर 'सीईटी सेल'ला पडला होता. विद्यार्थी, पालकांच्या विरोधानंतर ही अट मागे घेण्यात आली. त्यामुळे अनेक विद्यार्थ्यांना प्रवेशाच्या वेळी निर्माण झालेली अडचण दूर झाली होती. यानंतर आता मुदतवाढ देण्यात आली आहे. मराठवाड्यात तंत्रशिक्षणच्या ६१ संस्था आहेत. त्यांच्यामध्ये १९ हजार ४९५ विद्यार्थ्यांची प्रवेश क्षमता आहे. यंदा विद्यार्थ्यांचा तंत्रशिक्षण अभ्यासक्रमांकडील कल कमी झाल्याचे समोर आले आहे. मुदतवाढीमुळे ही संख्या कितीने वाढणार हे आगामी काळात स्पष्ट होणार आहे.
..