‘शेतकरी अडचणीत, पण सरकार गंभीर नाही’

औरंगाबाद : आधीच करोना संसर्गाचे संकट, त्यात अतिवृष्टीमुळे हाताचे आलेले पीक वाया गेले. त्यामुळे शेतकरी हवालदिल झाला आहे. त्यांना तातडीने मदत करणे गरजेचे आहे, पण राज्यातील आघाडी सरकार याबाबत गंभीर नाही, असा आरोप विधान परिषदेतील विरोधी पक्षनेते प्रवीण दरेकर यांनी गुरुवारी (एक ऑक्टोबर) येथे केला. पंचनाम्याचा खेळ न चालविता राज्य सरकारने नुकसानीचा छायाचित्रे ग्राह्य धरावीत, मुख्यमंत्री उद्धव ठाकरे यांनी तातडीने ओला दुष्काळ जाहीर करत हेक्टरी ५० हजार रुपये नुकसान भरपाई द्यावी, अशी मागणीही त्यांनी केली.

मराठवाड्यातील नुकसानीची पाहणी व आढावा घेण्यासाठी दरेकर गुरुवारी सायंकाळी औरंगाबादेत दाखल झाले त्याप्रसंगी सुभेदारी विश्रामगृह येथे ते 'मटा'शी बोलत होते. मराठवाड्यात यावर्षी चांगला पाऊस झाला धरणे भरली एकीकडे हे सुखद चित्र असतानाच झालेल्या अतिवृष्टीमुळे हाताचे पीक वाया गेल्याचे पाहण्याची दुर्दैवी वेळ शेतकऱ्यांवर आली आहे. त्यामुळे पंचनाम्याचे खेळ न मांडता मुख्यमंत्र्यांनी तातडीने ओला दुष्काळ जाहीर करावा, अशी मागणी त्यांनी केली.