म. टा. प्रतिनिधी, कन्नड
तालुक्यातील आंबा या गावातील सदू कान्हीराम जाधव यांच्या शेतवस्तीवरील घरास दिवाळीच्या दुसऱ्या दिवशी आग लागली. या आगीत सुमारे अडीच लाख रुपयांचे संसारोपयोगी व शेती साहित्य जळून खाक झाले.
आंबा गावाच्या शिवारातील फैशुबा परिसरातील गट क्रमांक १५ मधील सदू कान्हीराम जाधव यांच्या शेतवस्तीवरील घरास गुरुवारी (८ नोव्हेंबर) सकाळी अचानक आग लागली. या आगीत घरातील कापूस, हरभरा या शेतमालासह घरातील भांडी, संसार उपयोगी साहित्य, ठिबक नळ्या, पीव्हीसी पाइप, गुरांचा चारा, शेतातील पिकांवर फवारणी औषधी, खते, घरावरील पत्रे असे एकूण दोन लाख ५१ हजारांचे साहित्य जळून खाक झाले. शेजारील शेतकऱ्यांनी आग विझवण्याचा प्रयत्न केला. हा घटना सकाळी झाल्या मुळे व प्रसंगावधान राखल्याने जीवितहानी टळली. महसूल विभागाने या घटनेचा पंचनामा करण्यात आला असून हे शेतकरी कुटूंब उघड्यावर पडले आहे. या घरात लहान मोठे मिळून एकूण दहा सदस्य आहेत.