म. टा. प्रतिनिधी, औरंगाबाद
भारतीय कम्युनिष्ट पक्षाचे जेष्ठ नेते गोविंद पानसरे हत्याप्रकरणात कोल्हापूरच्या विशेष पोलिस पथकाने गुरुवारी दुपारी संशयित आरोपी शरद भाऊसाहेब कळसकर (वय २५, रा. केसापुरी, दौलताबाद जि.औरंगाबाद) याच्या घराची आणि शेतात झडती घेतली. सुमारे एक तास तपासणी केल्यानंतर हे पथक माघारी गेले. हे पथक बुधवारी रात्री शहरात दाखल झाले होते.
महाराष्ट्र अंधश्रद्धा निर्मूलन समितीचे जेष्ठ कार्यकर्ते नरेंद्र दाभोळकर हत्याप्रकरणात राष्ट्रीय तपास यंत्रणेने शरद कळसकर याला एक वर्षापूर्वी अटक केली आहे. दरम्यान, कोल्हापूर येथील जेष्ठ नेते गोविंद पानसरे यांच्या हत्याप्रकरणाचा तपास विशेष पोलिस पथक करीत आहे. या पथकाने ११ जून रोजी राष्ट्रीय तपास यंत्रणेच्या ताब्यातून शरद कळसकरला ताब्यात घेत अटक केली. या हत्येच्या तपासासाठी पथक बुधवारी रात्री शहरात दाखल झाले होते. येथील गुन्हे शाखेच्या ते संपर्कात होते. गुरुवारी दुपारी कळसकर याच्या घरी आणि शेताची झडती घेण्यासाठी पथक रवाना झाले. सुमारे एक तास या पथकाने झडती घेतली. यानंतर हे पथक पुन्हा पोलिस आयुक्तालयाकडे रवाना झाले. वरिष्ठ पोलिस दर्जाच्या अधिकाऱ्यासह हे पथक कळसकरला घेऊन आले होते. दुपारी हे पथक पुन्हा कळसकर घेऊन औरंगाबाद शहराबाहेर रवाना झाले. या पथकाने नेमकी काय तपासणी केली याची माहिती मिळू शकली नाही.
…
\Bचोख बंदोबस्त\B
विशेष पोलिस पथकाने कळसकर याच्या सुरक्षिततेबाबत गोपनीयता बाळगली होती. त्याच्या घराच्या तपासणी दरम्यान त्यांनी स्थानिक पोलिसांची देखील मदत घेतली. मात्र, कोल्हापूरच्या पथकाने स्थानिक पोलिसांना तपासणी दरम्यान कळसकरच्या गावात बंदोबस्तासाठी तैनात केले होते.