औरंगाबाद : एमआयएम नगरसेवक व महापालिकेतील विरोधी पक्षनेता फिरोज मोईनोद्दिन खान याचा नियमित जामीन मुंबई उच्च न्यायालयाच्या औरंगाबाद खंडपीठाचे न्या. संगीतराव पाटील यांनी २५ हजारांच्या बंधपत्रावर मंजूर केला.
फिरोजचा जामीन अर्ज जिल्हा व सत्र न्यायाधीश जयंत राजे यांनी २६ जून रोजी फेटाळला होता. शहरात उसळलेल्या दंगलीच्या काळात दीपक मन्नालाल जैस्वाल यांच्या बिअर बारच्या गोडावूनमधील विदेशी मद्याच्या साठ्याची तोडफोड करून पेटवून दिल्याच्या, तसेच जैस्वाल यांचे घर पेटवून दिल्यासंदर्भात दाखल गुन्ह्यात फिरोजखान १५ मे रोजी पोलिसांना शरण आला. न्यायालयाने त्याला १८ मेपर्यंत पोलिस कोठडी सुनावली होती. त्यानंतर त्यांना १८ मे रोजी न्यायालयीन कोठडी सुनावण्यात आली. तेव्हापासून तो न्यायालयीन कोठडीत आहे. यापूर्वी न्यायालयाने ३१ मे रोजी त्याचा जामीन अर्ज फेटाळला होता. त्याने दुसऱ्यांदा जामीनासाठी सत्र न्यायालयात अर्ज केला होता. अर्ज फेटाळल्यामुळे त्यांनी हायकोर्टात जामीनासाठी धाव घेतली होती. आरोपीचे नाव प्रथम माहिती अहवालात नाही, असे निवेदन करण्यात आले. त्याच्यातर्फे राजेंद्र देशमुख यांनी बाजू मांडली. त्यांना देवांग देशमुख, आनंद कुलकर्णी, वर्षा घाणेकर यांनी सहकार्य केले.