फुलंब्रीतील सफाईचे कंत्राट बेकायदा

फुलंब्री: येथील नगरपंचायतीची एकही सभा न घेता साफसफाईचे एक वर्षासाठी ८० लाख रुपयांचे कंत्राट पुणे येथील एका संस्थेला देण्यात आले आहे. हे कंत्राट रद्द करावे, अशी मागणी नगरपंचायतीचे गटनेते रऊफ कुरेशी यांनी संबंधितांना दिले आहे.

पुणे येथील बीव्हीजी इंडिया लिमिटेड प्रिमियर प्लाझा पुणे-चिंचवड या संस्थेला ३१ जानेवारी २०१८ रोजी कार्यारंभ आदेश दिला आहे. १३ डिसेंबर २०१७ रोजी नगरपंचायतीची सार्वत्रिक निवडणूक झाली. १४ डिसेंबर रोजी मतमोजणी व १९ जानेवारी २०१८ रोजी नगरसेवकांच्या बैठकीत उपनगराध्यक्षाची निवड करण्यात आली. त्यानंतर नगरसेवकांची एकही बैठक झालेली नाही. त्यामुळे हे कंत्राट बेकायदा असल्याचा आरोप निवेदनात केला आहे. हे निवेदन नगर विकास मंत्री, विभागीय आयुक्त, जिल्हाधिकारी, मुख्याधिकारी यांना दिले आहेत.