\Bम. टा. प्रतिनिधी, औरंगाबाद
\B'फोन पे'च्या सेफ गोल्ड स्कीममध्ये गुंतवणूक केल्यास कॅशबॅक मिळेल, असे आमिष दाखवत तरुणीचे ऑनलाइन तीन लाख ९७ हजार रुपये लांबवण्यात आले. तीन डिसेंबर ते आठ डिसेंबरच्या दरम्यान हा प्रकार घडला. या प्रकरणी अज्ञात आरोपीविरुद्ध सायबर पोलिस ठाण्यात गुन्हा दाखल करण्यात आला आहे.
या प्रकरणातील २१ वर्षांची तरुणी पदवीचे शिक्षण घेत आहे. तरुणीने काही रक्कम तिच्या एसबीआय बँकेच्या खात्यात ठेवली होती. तसेच दैनदिन व्यव्हारांकरिता ही तरुणी मोबाइलवर 'फोन पे' या अॅपचा वापर करते. ३० नोव्हेंबर रोजी या तरुणीच्या मोबाइलवर अनोळखी मोबाइलधारकाचा कॉल आला. समोरील तरुणाने स्वत:चे मनोज नाव सांगत 'फोन पे' कंपनीमधून बोलत असल्याची थाप मारली. 'फोन पे'च्या गोल्ड स्कीम मध्ये गुंतवणूक केल्यास कॅश बॅक मिळेल असे तरुणीला सांगण्यात आले. यानंतर तिच्या मोबाइलवर 'फोन पे'वर एक नोटीफिकेशन आले. या तरुणीने त्यावर क्लीक करीत एक वेळा ९९९ आणि दुसऱ्या वेळी ४९९ असे पैसे पाठविले. मात्र, तिला कॅशबॅक किंवा कोणतेही नोटीफिकेशन आले नाही. यानंतर या तरुणीच्या अॅप वारंवार नोटीफिकेशन येत जाऊन रक्कम कमी होत गेली. तरुणीने 'फोन पे' कंपनीला कॉल करून आपल्याला गुंतवणूक करायची नसून, पैसे परत करण्याची मागणी केली. यानंतर तीन डिसेंबर रोजी या तरुणीला पुन्हा एक कॉल आला. यामध्ये पैसे रिफंड करण्यासाठी तुम्हाला एक मेसेज येईल असे सांगण्यात आले. तिला आलेले मॅसेज तिने कॉपी करून कंपनीला पाठवले. यावेळी तिला तुमचे 'एसबीआय'चे अकाउंट एएनडीबी भीम अॅपवर रजिस्टर झाले आहे, असे सांगण्यात आले. यानंतर तीन डिसेंबर ते आठ डिसेंबर या कालवधीत तिच्या खात्यातून ऑनलाइन एकूण तीन लाख ९७ हजार ५८९ रुपये काढून घेतले. या प्रकरणी तरुणीच्या तक्रारीवरून सायबर पोलिस ठाण्यात अज्ञात आरोपीविरुद्ध फसवणुकीचा गुन्हा दाखल करण्यात आला आहे.