दहावीच्या विद्यार्थ्यांना मोफत खासगी क्लास

म. टा. प्रतिनिधी, औरंगाबाद
महापालिका शाळेतील दहावीच्या विद्यार्थ्यांना खासगी कोचिंग क्लासेसमध्ये नवीन शैक्षणिक वर्षापासून मोफत शिक्षण मिळणार आहे. आयुक्तांनी आयोजित केलेल्या बैठकीत कोचिंग क्लासच्या संचालकांनी याबद्दलची तयारी दर्शवली. सामाजिक बांधीलकीच्या भावनेने कोचिंग क्लासचे संचालक हा उपक्रम राबविणार आहेत.
महापालिकेच्या ७० शाळांपैकी १२ शाळांमध्ये दहावीचे वर्ग आहेत. या वर्गांमध्ये गरीब घरातील मुले - मुली शिक्षण घेतात. दोन - तीन वर्षांपासून पालिका शाळेतील दहावीच्या परीक्षेचा निकाल उंचावू लागला आहे. ९० टक्क्यांपेक्षा जास्त गुण घेणारे विद्यार्थी या शाळांमधून पुढे येऊ लागले आहेत. येत्या काळात दहावीच्या परीक्षेच्या निकालाचा आलेख उंचवावा यासाठी पालिकेच्या प्रशासनाकडून प्रयत्न केले जात आहेत. त्याचाच एक भाग म्हणून आयुक्त डी. एम. मुगळीकर यांनी १६ मे रोजी शहरातील खासगी कोचिंग क्लासेसच्या संचालकांची बैठक आयोजित केली होती. या बैठकीला १५ क्लासचे संचालक उपस्थित होते. महापालिकेच्या शाळेत दहावीच्या वर्गात जेवढे विद्यार्थी शिक्षण घेतात त्या सर्वांची मोफत शिकवणी घेण्याची तयारी क्लासेसच्या संचालकांनी दाखवल्याची माहिती मुगळीकर यांनी दिली. पाचशे ते सातशे विद्यार्थी दहावीच्या वर्गात शिक्षण घेतात. या सर्वांना खासगी क्लासेसमध्ये शिक्षण दिले जाणार आहे. मुगळीकर यांनी घेतलेल्या बैठकीला चाटे क्लासेस, व्हिजन क्लासेस, मापारी क्लासेस, पठाण - बाबर क्लासेस, पॉझिटीव्ह क्लासेस, माऊली क्लासेस, व्यवहारे क्लासेस, ज्ञानसागर क्लासेस आदींचे प्रतिनिधी उपस्थित होते.

प्रत्येक शाळेत फस्टएड बॉक्स
महापालिकेच्या सत्तर शाळा आहेत. प्रत्येक शाळेमध्ये फस्टएड बॉक्स उपलब्ध करून दिला जाणार आहे. आतापर्यंत कोणत्याही शाळेत फस्टएड बॉक्स नव्हता. सोमवारी एका शाळेत फस्टएड बॉक्सचे उद्‍घाटन महापौरांच्या हस्ते करू, अशी माहिती आयुक्त डी. एम. मुगळीकर यांनी दिली.