म. टा. प्रतिनिधी, औरंगाबाद
सीमेवर शत्रुंशी लढताना शहीद झालेले जवान, त्यांच्या घरातील परिस्थिती तसेच आपल्या मुलांनाही देशाच्या संरक्षणासाठी पाठविण्याचा शहीद पत्नीचा केलेला प्रण असा सजीव देखावा श्री सिद्धीविनायक गणेश मंडळाने सादर केला.
चिकलठाणा येथील भाजीमंडीत श्री सिद्धीविनायक गणेश मंडळातर्फे यंदा शहीद जवान व त्यांचे कुटूंब या विषयावर सजीव देखावा सादर करण्याचा निर्णय घेण्यात आला आहे. या मंडळाचे अध्यक्ष सचिन रघुनाथ रिठे, उपाध्यक्ष प्रशांत प्रकाश जाधव, सागर जाधव, राहुल अंदुरे, जीतू मोकळे, शिवा टाक, कल्पेश छाजेड, शेख सलीम असे हे मंडळ आहे. श्री सिद्धी विनायक गणेश मंडळातर्फे देखाव्याची सुरुवात ही एक जवान घरून सीमेवर जात असतानाचे दृष्यावरून सुरुवात होते. तो जवान सीमेवर शहीद होतो. यानंतर शहीद पत्नीने त्याच्या मुलालाही देशासाठी लढणारा जवान करण्याचा केलेला निर्धार यावर हा सजीव देखावा आधारित आहे.
सर्जिकल स्ट्राईकवर जय मल्हार गणेश मंडळाचा सजीव देखावा
चिकलठाणा भागातील सावित्रीबाई फुले चौकात असलेल्या जय मल्हार गणेश मंडळातर्फे दरवर्षी सजीव देखावा सादर करण्याची परंपरा आहे. गेल्यावर्षी शेतकरी आणि त्याच्या कुटुंबाची कथा सजीव देखाव्यातून मांडण्यात आली होती. यात शेतकऱ्यांच्या मागे पाडुरंग उभा असल्याचे दाखविण्यात आले. यंदा सर्जिकल स्ट्राईकवर सजीव देखावा तयार करण्यात आला आहे. या सर्जिकल स्ट्राईकवर सादर करण्यात आलेल्या देखाव्यातून भारतीय सैन्याचे पराक्रम, शत्रू राष्ट्रावर केलेला हल्ला याचे सादरीकरण करण्यात आले आहे. मंडळाचा हा देखावा पाहण्यासाठी भाविकांची मोठी गर्दी होत आहे.