म. टा. प्रतिनिधी, औरंगाबाद
जागतिक हृदय दिनानिमित्त प्रोझोनमधील अॅब्स फिटनेस अँड वेलनेस क्लबतर्फे शनिवारी (२८ सप्टेंबर) 'फन रन'चे आयोजन करण्यात आले आहे. 'फन रन'मध्ये विद्यार्थ्यांसह तरुण-तरुणी, ज्येष्ठ नागरिकांचाही समावेश असणार आहे. सुमारे तीन किलोमीटर अंतराच्या या 'फन रन'मध्ये सहभागी होणाऱ्या सर्व स्पर्धकांना सहभाग प्रमाणपत्राने सन्मानित करण्यात येणार आहे.
पंतप्रधान नरेंद्र मोदी यांनी सुरू केलेल्या फिट इंडिया कॅम्पेनचाच 'फन रन' एक भाग असेल. जागतिक हृदयदिनाच्या एक दिवस आधी शनिवारी (२८ सप्टेंबर) सकाळी साडेसहा वाजता प्रोझोन मॉलमधील अॅब्स फिटनेस अँड वेलनेस क्लबपासून 'फन रन'ला सुरुवात होणार आहे, असे अॅब्सचे संचालक जितेंद्रसिंग सलुजा यांनी सांगितले. यंदा या उपक्रमाचे दुसरे वर्ष आहे. 'फन रन' क्रेझी बाइट, एन-एक गणपती मंदिर, आयसीडी कॉर्नर, जागृत हनुमान मंदिर, जैन टॉडलर्स, महावितरण सब स्टेशनमार्गे परत प्रोझोनला परतेल. यादरम्यान फिटनेसविषयी जनजागृती करण्यात येणार आहे.