म. टा. प्रतिनिधी कन्नड
कन्नड शहरात व तालुक्यात मागील आठवडाभरापासून गॅस सिलिंडकसाठी दोन गॅस एजन्सीकडून तुटवडा दाखवून ग्राहकांना ऐन दिवाळी सणाच्या तोंडावर वेठीस धरण्यात येत आहे. शहरातील व ग्रामीण भागातील घरगुती व व्यावसायीक ग्राहकांना कन्नड येथील इंडेनचे वितरक गंगासागर गॅस एसन्सी व बद्रीनारायण गॅस एजन्सीच्या कार्यालयावर चकरा माराव्या लागत आहेत.
ऑफिसमधील ऑनलाइन बुकिंग बंद करून ग्राहकांना तासोन्तास ताटकळत बसण्याची वेळ येऊन ठेपली आहे. ऐन दिवाळी सणाच्या तोंडावर या गॅस सिलिंडरच्या टंचाईमुळे कन्नड शहर देवगाव (रंगारी), हतनूर, चापानेर, अंधानेर, वासडी, पिशोर, नाचनवेल, करंजखेड येथील ग्राहकांची मोठी पंचाईत होत आहे. ग्राहकांना कन्नड येथे चकरा मारण्यात वेळ व पैसा वाया जात आहे. दिवाळीच्या सणाच्या तोंडावर गॅस पुरवठा सुरळीत करण्याची मागणी ग्राहक करत आहे, मात्र या गॅस एजन्सीकडून ग्राहकांना जास्तीचा मोबदला दिला की गॅस सिलिंडर तात्काळ उपलब्ध करून दिली जाते, अशी चर्चा ग्राहकांमध्ये सुरू आहे. याबाबत हतनूर येथील ग्राहक संदीप महिंद्रकर यांनी सांगितले की, मी हतनूर येथून मागील तीन दिवसापासून बुकिंग करूनही रोज मला हतनूर येथून चकरा माराव्या लागत आहे. यामुळे उपासमारीची वेळ येऊन ठेपली आहे तर, रोजगारही बुडत आहे.