कौतुक सोहळ्याला आवर्जून या
म. टा. प्रतिनिधी, औरंगाबाद
हार न मानता प्रतिकूल परिस्थितीला टक्कर देत दहावीत लखलखीत यश मिळवलेल्या पाच गुणवंत विद्यार्थ्यांच्या संघर्षगाथा 'म.टा.'ने वाचकांपुढे ठेवल्या. त्यांना त्यांच्या स्वप्नांचे शिखर गाठण्यासाठी वाचकांनी दातृत्वाची प्रचिती दिली. आता क्षण आला आहे तुम्ही दिलेले देणे गुणवंतांच्या हाती सुपूर्द करण्याचा. हे देणे अधिक सुंदर करण्यासाठी जिल्हा परिषदेच्या सीईओ पवनित कौर, महावितरणचे मुख्य अभियंता सुरेश गणेशकर, मराठवाडा शिक्षण प्रसारक मंडळाचे उपाध्यक्ष शेख सलीम हे या कार्यक्रमाला उपस्थित रहाणार आहेत. हा कार्यक्रम आज शुक्रवार ३० ऑगस्ट रोजी सायंकाळी साडेचार वाजता होणार आहे.
'महाराष्ट्र टाइम्स'च्या वाचकाभिमुकतेची ग्वाही देणाऱ्या 'म.टा. हेल्पलाइन' उपक्रमाचे यंदा हे आठवे वर्ष आहे. औरंगाबादमधील वाचकांनी प्रारंभापासूनच या उपक्रमाला अगदी भरभरून प्रतिसाद दिला आहे. दरवर्षीप्रमाणेच यंदाही हा मदतीचा ओघ भरपूर होता. हेच वाचकांचे देणे गुणवंतांच्या हाती शुक्रवारी सुपूर्द केले जाणार आहे. दहावीत चांगले गुण मिळवूनही केवळ विपरित आर्थिक परिस्थितीमुळे पुढील शिक्षणाची वाट खुंटण्याची भीती असलेले विद्यार्थी व विद्यार्थिनी आपल्या अवतीभवती असतात. केवळ आपल्या आर्थिक अडचणींमुळे त्यांचे शिक्षण थांबू नये म्हणून 'महाराष्ट्र टाइम्स'तर्फे हा उपक्रम राबविण्यात येत आहे. या उपक्रमाअंतर्गत आर्थिक मदत मिळालेल्या अनेक विद्यार्थ्यांनी उत्तम शिक्षण घेतले आहे. 'म.टा.'ने अशा विद्यार्थ्यांची निवड करून त्यांचा प्रवास सर्वांसमोर मांडला आहे. या गुणवंतांच्या पंखांना बळ देण्यासाठी वाचकांनी भरभरून प्रतिसाद दिला आहे. वाचकांच्या मदतीवर व त्यांच्या अपार प्रेमामुळे 'म.टा. हेल्पलाइन' या उपक्रमाला खऱ्या अर्थाने बळ मिळते. वाचकांचे हे देणे गुणवंतांकडे सुपूर्द करण्यासाठी शुक्रवारी आयोजित केलेला सोहळा सर्वांसाठी खुला आहे. वाचकांनी या गुणवंतांच्या पाठीवर कौतुकाची थाप देण्यासाठी उपस्थित राहावे, असे आवाहन म.टा. परिवाराच्या वतीने करण्यात येत आहे.
प्रमुख उपस्थिती
पवनित कौर, सीईओ, जिल्हा परिषद
सुरेश गणेशकर, मुख्य अभियंता, महावितरण
शेख सलीम, उपाध्यक्ष, मराठवाडा शिक्षण प्रसारक मंडळ
सोहळा कुठे?
देवगिरी इंजीनिअरिंग कॉलेजचे सभागृह
कधी?
आज, शुक्रवार, ३० ऑगस्ट.
सायंकाळी ४.३० वाजता.