ग्रेस गुणांची सवलत ४२ खेळांनाच

ग्रेस गुणांची सवलत ४२ खेळांनाच
नियमित प्रवेशाची अट
म. टा. प्रतिनिधी, औरंगाबाद
विविध क्रीडा प्रकारांतील खेळाडूंना २५ ग्रेस गुणांची सवलत मिळणार आहे. ही सवलत ४२ खेळांनाच मिळणार आहे. ग्रेस गुणांची सवलतीसाठी २० मार्चपर्यंत प्रस्ताव स्विकारण्यात येणार आहेत.
जिल्हा क्रीडा कार्यालयाने जिल्ह्यातील माध्यमिक व उच्च माध्यमिक शाळांचे प्राचार्य व मुख्याध्यापकांना पत्राद्वारे ग्रेस गुणांबाबतची माहिती पाठवली आहे. २०१६-१७ या शैक्षणिक वर्षात फक्त शालेय (शासकीय) क्रीडा स्पर्धेत राज्य, राष्ट्रीय व आंतरराष्ट्रीय क्रीडा स्पर्धेत सहभाग अथवा प्राविण्यप्राप्त खेळाडूंना ग्रेस गुणांची सवलत मिळणार आहे. तसेच एकविध क्रीडा संघटनांच्या खेळांचे प्रस्ताव शासन निर्णयातील अटींची पूर्तता केल्यानंतरच संबंधित खेळाडूंना ग्रेस गुणांची सवलत देण्याविषयीचा निर्णय घेतला जाणार आहे, असे पत्रात स्पष्ट करण्यात आले आहे.
ग्रेस गुणांसाठीचे प्रस्ताव फक्त शालेय राज्य, राष्ट्रीय व आंतरराष्ट्रीय स्पर्धेत सहभागी व प्राविण्यप्राप्त खेळाडूंचे पाठवावे लागणार आहेत. दहावी व बारावीसाठी नियमित प्रवेश असलेल्या खेळाडूंनाच याचा लाभ मिळणार आहे, असे जिल्हा क्रीडा अधिकारी ऊर्मिला मोराळे यांनी सांगितले. राजीव गांधी खेल अभियान (९ क्रीडा प्रकार), भारतीय क्रीडा प्राधिकरणाच्या क्रीडा स्पर्धा (१२ क्रीडा प्रकार), मुकबधिरांच्या क्रीडा स्पर्धा (९ क्रीडा प्रकार) व पॅरालिंपिक (८ क्रीडा प्रकार) या स्पर्धांमधील खेळाडूंनाही ग्रेस गुणांचा लाभ मिळू शकणार आहे.
ग्रेस गुणांसाठी पात्र क्रीडा प्रकार
अॅथलेटिक्स, तिरंदाजी, बॅडमिंटन, बास्केटबॉल, बॉक्सिंग, बेसबॉल, बुद्धिबळ, क्रिकेट, विनू मांकड क्रिकेट स्पर्धा, सी. के. नायडू क्रिकेट, सायकलिंग रोडरेस, फुटबॉल, तलवारबाजी, जिम्नॅस्टिक्स, हॉकी, हँडबॉल, ज्युदो, कबड्डी, खोखो, टेनिस, नेटबॉल, रोलर स्केटिंग क्वॉड व इनलाइन, रोलर हॉकी, रोलबॉल, नेमबाजी, जलतरण, डायव्हिंग, वॉटरपोलो, सॉफ्टबॉल, टेबल टेनिस, तायक्वोंदो, व्हॉलिबॉल, कुस्ती, वेटलिफ्टिंग, योगा, सुब्रतो करंडक फुटबॉल, नेहरू करंडक हॉकी, मल्लखांब, बॉल बॅडमिंटन, कॅरम, डॉजबॉल, किकबॉक्सिंग, सिकई मार्शल आर्ट, थ्रोबॉल.