म. टा. प्रतिनिधी, औरंगाबाद
पुढील वर्षी जून महिन्यात विधान परिषदेच्या मराठवाडा पदवीधर मतदारसंघाची निवडणूक होत असून, त्यासाठी येत्या एक ऑक्टोबरपासून मतदार नोंदणी अभियान हाती घेण्यात येणार आहे. हे अभियान सहा नोव्हेंबरपर्यंत सुरू राहणार आहे.
विधान परिषदेच्या पदवीधर मतदारसंघासाठी ११ नोव्हेंबर २०१६ पूर्वी पदवीधर झालेल्यांची मतदार म्हणून नोंद करता येईल. पदवीधर झाल्यानंतर तीन वर्षांनी या मतदारसंघात मतदार म्हणून नाव नोंदवले जावू शकते. अन्य निवडणुकीत पूर्वीची मतदार यादी असते. मात्र, या निवडणुकीसाठी यापूर्वीची यादी गृहीत धरली जाणार नाही. त्यामुळे यापूर्वी यादीत नाव असलेल्यांनाही नव्याने नोंदणी करावी लागणार आहे.
या मतदार यादीत नाव नोंदवण्यासाठी नावनोंदणी फॉर्मसोबत पदवी प्रमाणपत्र किंवा पदवी परीक्षेच्या मार्कमेमोची साक्षांकित केलेली प्रत आवश्यक आहे. निवडणुकीसाठी नावनोंदणीसाठी अर्ज तहसील कार्यालयात उपलब्ध राहणार आहेत. अर्ज भरल्यानंतर मंडळ अधिकाऱ्यांकडेही तो दिला जावू शकतो. तहसीलदार त्याची छाननी करतील आणि त्यानंतर उपविभागीय अधिकारी तपासणी करून नाव यादीत घेतील. प्रत्येक तहसील तसेच जिल्हाधिकार्यालयात यासाठी एक स्वतंत्र कक्ष आहे. अर्थात सर्वच पक्षाचे इच्छुक उमेदवार घरोघर येऊन अर्ज देताहेत अन घेऊनही जात आहेत.
\Bनाव नोंदणीसाठी...
\B- पदवी मिळून तीन वर्ष व्हावे
- नोंदणीसाठी पदवीप्रमाणपत्र हवे
- पदवी परीक्षेचा मार्कमेमोही चालेल
- दोन्ही पैकी एकाची साक्षांकित प्रत हवी