म. टा. प्रतिनिधी, औरंगाबाद
महापालिकेला राज्य सरकारकडून वस्तू व सेवा कराचे (जीएसटी) अनुदान मिळाले आहे. त्यानंतर महापालिका प्रशासनाने अधिकारी, कर्मचारी यांचे वेतन व निवृत्तवेतन दिले आहे, असे महापालिकेच्या लेखा विभागातून सांगण्यात आले. महापालिकेत कंत्राटी पद्धतीवर असलेल्या कर्मचाऱ्यांच्या वेतनासाठी संबंधित एजन्सीला धनादेश देण्यात आले आहेत.
राज्य शासनाकडून मिळणारे 'जीएसटी'चे अनुदान रखडल्यामुळे महापालिकेच्या अधिकारी, कर्मचाऱ्यांचे एप्रिल महिन्याचे वेतन झाले नव्हते. गुरुवारी (२१ मे) सकाळी राज्य शासनाकडून महापालिकेला 'जीएसटी' अनुदानाचे २४ कोटी रुपये प्राप्त झाले. त्यानंतर प्रशासक आस्तिककुमार पांडेय यांनी लेखा विभागाला वेतन करण्याचे आदेश दिले. अधिकारी, कर्मचाऱ्यांच्या वेतनासाठी १५ कोटी रुपये खर्च झाले. सेवानिवृत्त कर्मचाऱ्यांच्या निवृत्ती वेतनासाठी अडीच कोटी रुपये, कंत्राटी कर्मचाऱ्यांच्या वेतना दोन कोटी दहा लाख रुपये, रेड्डी कंपनीला दोन कोटी ३० लाख रुपये देण्यात आले.