म. टा. प्रतिनिधी, औरंगाबाद
आगामी हज यात्रेबाबत सऊदी अरेबिया प्रशासनाने अद्याप कोणतीच घोषणा केलेली नाही. मात्र, करोना विषाणूमुळे उद्भवलेली परिस्थिती लक्षात घेऊन यात्रेसाठी भरलेली रक्कम परत करण्याची मागणी अनेकांनी केली आहे. त्याची दखल घेत केंद्रीय हज समितीने अर्जदारांना ऑनलाइन अर्ज उपलब्ध करून दिले आहे. तो भरून त्यांना हज यात्रेचा अर्ज रद्द करता येणार आहे.
भारतात लॉकडाऊन लागण्यापूर्वी सऊदी सरकारनेही त्यांच्याकडे हज आणि उमराह या धार्मिक यात्रेवर बंदी टाकण्याचा निर्णय घेतला होता. पण, देशातील करोनाची स्थिती आणि सऊदी अरेबिया सरकारने अद्याप स्पष्ट निर्णय जाहीर केलेला नाही. हा निर्णय जूनअखेरपर्यंत होण्याची शक्यता आहे. यात्रेकरिता हाजींनी केंद्रीय हज समितीकडे रक्कम भरली आहे. लॉकडॉऊनमुळे अनेकांची आर्थिक परिस्थिती खालावली असल्याने यात्रेसाठीचा अर्ज रद्द करून रक्कम परत द्यावी, असा तगादा लावण्यात आला होता. त्यामुळे केंद्रीय हज समितीने यात्रा रद्द करण्यासाठी ऑनलाइन अर्ज संकेतस्थळावर उपलब्ध करून दिला आहे.
औरंगाबाद एम्बार्केशन पॉइंटवरून औरंगाबाद शहरासह बीड, परभणी, जालना, उस्मानाबाद, लातूर, हिंगोली, अहमदनगर या जिल्ह्यातील यात्रेकरू जातात. मराठवाड्यातून २८००पेक्षा जास्त प्रवासी जात असतात. यंदा औरंगाबाद पॉइंटवरून जाणाऱ्या हाजींची संख्या ८५६ इतकी होती.
…
\Bअसा करावा अर्ज\B
केंद्रीय हज समितीच्या संकेतस्थळावर हज यात्रा रद्द करण्याच्या पर्यायावर क्लिक करावे. त्यानंतर हज यात्रेचा क्रमांक आणि नाव दाखल करून रद्द करण्याचे कारण एका बॉक्समध्ये टाकून व्हेरिफाय बटनवर क्लिक केल्यानंतर सेक्युरिटी कोड टाकून ओके फार्म सबमिट करावा. यानंतर एक ओटीपी क्रमांक मोबाइलवर येईल. हा ओपीटी टाकल्यानंतर बँक डिटेल्सची माहिती संगणकावर येणार आहे. या माहितीस ओके क्लिक केल्यानंतर अर्ज रद्द केल्याची व रिक्वेस्ट नंबर संगणकावर येणार आहे. त्यानंतर पैसे परत करण्यासंबंधीची कार्यवाही बँकेच्या माध्यमातून केली जाईल, असे केंद्रीय हज समितीकडून कळविण्यात आले.